उपप्रधान एवं रक्षामन्त्री ईश्वर पोखरेलको संयोजकत्वमा गठित कोरोना संक्रमण रोकथाम तथा नियन्त्रण उच्चस्तरीय समितिले विश्वविद्यालयका सबै तहका परीक्षा स्थगित गर्नुका साथै नियमित कक्षा पनि बन्द गर्न निर्देशन दिएको छ ।
समितिले चैत ६ बिहीबारबाटै लागू हुने गरी विश्वविद्यालयका सबै तहका परीक्षा स्थगित तथा नियमित कक्षा बन्द गर्न निर्देशन दिएको शिक्षा मन्त्रालयका प्रवक्ता दीपक शर्माले बताए । ‘चैतभर नियमित कक्षा बन्द गर्न निर्देशन दिएको छ,’ उनले भने, ‘तर परीक्षा स्थगित गर्ने वा नगर्ने भन्ने विषयमा भने विश्वविद्यालयले निर्णय गर्ने छ ।’
शिक्षा मन्त्रालयका सचिव महेशप्रसाद दाहालले चैतमा सञ्चालन हुने विश्वविद्यालयका सबै परीक्षा स्थगित गर्ने निर्णय भएको बताए । उनले भने, ‘समितिको निर्देशनअनुसार नै सरकारले विश्वविद्यालयका चैतमा हुने तालिका रहेका सबै परीक्षा स्थगित गर्ने निर्णय गरेको हो ।’
कक्षा ११ र १२ को परीक्षा आउन भने करिब एक महिना बाँकी रहेकाले त्यसका विषयमा हालसम्म कुनै निर्णय नभएको पनि शिक्षा सचिव दाहालले बताए । कक्षा ११ र १२ को परीक्षा राष्ट्रिय परीक्षा बोर्डले लिँदै आएको छ । राष्ट्रिय परीक्षा बोर्डमार्फत नै भोलि ६ चैतबाट हुने तालिका रहेको एसइई परीक्षा भने स्थगित भइसकेको छ ।
