कोरोना भाइरसको महामरीको प्रकोपबाट बच्न सरकारले लकडाउनको घोषणा गरेपछि लकडाउनका कारण समस्यामा परेकाहरूका लागि उदार हृदय भएका समाजसेवीहरूबाट संस्थागत वा व्यक्तिगत रूपमा खाद्य सामग्री वितरणको कार्य पनि आरम्भ भएको छ । यसैक्रममा उपत्यका ट्याक्सी व्यवसायी तथा चालक सेवा समाजका अध्यक्ष सानु पूर्वछाने मगर, नेपाल हेभी इक्विपमेन्ट व्यवासायी महासंघका अध्यक्ष ताराबहादुर कुँवर र महिला ट्याक्सी चालक तथा समाजसेवी नवीना खड्काको पहलमा खाद्य सामग्री वितरण गरिएको छ ।
शुक्रबार र शनिबार काठमाडौं उपत्यकाका जोरपाटी, कलंकी, बाफल, नागार्जुन, रातोपुललगायतका क्षेत्रका अशक्त, अपांग, असाय, विपन्न र ज्याला मजदुरी गरेर गुजारा चलाउनेहरूलाई लक्ष्य गरी खाद्य सामग्री वितरण गरिएको थियो । शुक्रबार बाफल, कलंकी र नागार्जुन क्षेत्रका ७१ घरपरिवारलाई राहत वितरण गरेको र शनिबार रातोपुल र जोरपाटी क्षेत्रमा राहत वितरण गरिएको सानु पूर्वछाने मगरले नवकान्तिपुर डटकमलाई जानकारी दिए ।
नगरपालिकाबाट गरिएको राहत वितरणमा पहुच भएकाहरूले र आफ्नाहरूले मात्र पाउने गरेको गुनासो गर्दै अध्यक्ष मगरले आफूहरूले अपांग, अशक्त तथा राहत पाउनबाट बञ्चितहरूलाई दाल, चामल, आलु, चिनी, चियापत्ती, तरकारीलगायतका सामग्री प्रदान गर्दै आएको बताए ।
विश्वव्यापी महामारीका रूपमा फैलिरहेको कोरोना भाइरससँग जुध्न र यो संकटको घडीमा सबैले आ–आफ्नो ठाउँबाट एकअर्कालाई सहयोग गर्नुपर्ने अध्यक्ष मगरले बताए । साथै संकटको बेला एक छाक टार्न धौधौ हुनेहरूका लागि सदैव आफूले साथ र सहयोग दिइरहने उनको भनाइ छ ।
