सरकारले नेपाल प्रहरीमा विद्यमान ३० वर्षे सेवाहदको प्रावधान हटाउने गृहकार्य शुरु गरेको छ । प्रहरी महानिरीक्षक सर्वेन्द्र खनालको ब्याच ३० वर्षे सेवाहदका कारण अवकाशमा जानै लाग्दा सरकारले प्रहरी नियमावली संसोधन गरेर नयाँ व्यवस्थगा लागू गर्न लागेको प्रधानमन्त्री कार्यालय सम्बद्ध उच्च स्रोतले जानकारी दियो ।
दक्ष जनशक्ति छिट्टै घर जाने र नयाँ भर्ना गर्दा राज्यलाई चर्को व्ययभार पर्ने अवस्थालाई मध्यनजर गर्दै प्रहरी नियमावली २०७१ मा रहेको ३० वर्षे सेवाहदको प्रावधान हटाउने तयारी थालिएको उच्च स्रोतको दावी छ । सोहीअनुसार प्रस्तावित नेपाल प्रहरी ऐन २०७६ को मस्यौदा मन्त्रीपरिषदको कार्यालय पुगेको छ ।
‘आगामी मन्त्रीपरिषद बैठकले प्रस्तावित ऐनमा ३० वर्षे सेवाहदको प्रावधान तत्काल हटाउने बुँदा थपेर संघीय संसदमा नेपाल प्रहरी ऐन २०७६ दर्ता गर्नेछ ।’ उच्च स्रोतले भन्यो । ‘त्यस लगत्तै बस्ने मन्त्रीपरिषद बैठकले संसदमा कानुन दर्ता भईसकेको अवस्थामा प्रहरी नियमावली संसोधन गर्न वान्छनिय भएको भन्दै ३० वर्षे सेवाहदको प्रावधान हटाउने छ ।’
मन्त्रीपरिषद पुगेको प्रस्तावित नेपाल प्रहरी ऐन २०७६ लागू भएपछि प्रहरी कर्मचारीले पदावधि र उमेरहदको आधारमा मात्रै सेवानिबृत हुनेछन् । प्रस्तावित ऐनमा प्रहरी महानिरीक्षक (आईजी) को पदावधि ३ वर्ष, प्रहरी अतिरिक्त महानिरीक्षक (एआईजी) को ४ वर्ष, प्रहरी नायब महानिरीक्षक (डीआईजी) को ५ वर्ष, प्रहरी वरिष्ठ उपरीक्षक (एसएसपी) को ६ वर्ष र प्रहरी उपरीक्षक (एसपी) को पदावधि १० वर्ष रहने प्रस्ताव गरिएको छ ।
त्यस्तै प्रहरी महानिरीक्षक (आईजी) को उमेरहद ५८ वर्ष, प्रहरी अतिरिक्त महानिरीक्षक (एआईजी) को ५७ वर्ष, प्रहरी नायब महानिरीक्षक (डीआईजी) र प्रहरी वरिष्ठ उपरीक्षक (एसएसपी) को ५६ वर्ष र प्रहरी उपरीक्षक (एसपी) देखि तलको सबै दर्जामा ५५ वर्ष उमेर हद रहने प्रस्ताव गरिएको छ ।
विद्यमान ३० वर्षे सेवाहदको प्रावधान हटेमा हालका महानिरीक्षक (आईजी) सर्वेन्द्र खनालको कार्यकाल १४ महिना थपिनेछ । खनाल २०७४ चैत्र २९ मा प्रहरी महानिरीक्षकमा नियुक्त भएका थिए । त्यसो भएमा खनालको ब्याचका प्रहरी अतिरिक्त महानिरीक्षक (एआईजी) र प्रहरी नायब महानिरीक्षक (डीआईजी) हरुको कार्यकाल केही समय लम्बिनेछ ।
