लामो समयदेखि प्रेम सम्बन्धमा रहेका अभिनेत्री साम्राज्ञीराज्य लक्ष्मी राणा र देवांश राणाको ब्रेकअप भएको खबर सार्वजनिक भएको छ । साम्राज्ञी २ वर्षदेखि देवांश राणासँग प्रेममा थिइन् । उनीहरुको प्रेम सामाजिक सञ्जालमा पनि छताछुल्ल रुपमा देख्न पाइन्थ्यो । तर, केही समयअघि यी दुईबीचको प्रेम सम्बन्ध टुटेको बताइएको छ ।

झण्डै ३ महिनादेखि साम्राज्ञीका कुनै पनि सामाजिक सञ्जालमा देवांशको उपस्थिति नदेखिनुले पनि यो कुरालाई पुष्टि गरेको छ । यति मात्रै होइन साम्राज्ञीले सामाजिक सञ्जालमा हालेका देवांशसँगका पुराना धेरै फोटा पनि हटाएकी छन् । साम्राज्ञीको ग्यालरीमा बाक्लै भेटिने देवांश अब मुस्किलले मात्रै भेटिने भएका छन् ।

चलचित्र ‘ड्रिम्स’बाट नेपाली रजतपटमा भित्रिएकी साम्राज्ञी र देवांशको प्रेम बालीमा खिचिएका तस्बिर सार्वजनिक भएसँगै चर्चामा आएको थियो । त्यसपछिका सार्वजनिक कयौं कार्यक्रमहरुमा पनि सँगै देखिएको यो जोडीको विवाह हुने चर्चा समेत शुरु भएको थियो । प्रेममा रहँदा साम्राज्ञी र देवांशले एक म्युजिक भिडियोमा सँगै अभिनय समेत गरे । जुन गीत साम्राज्ञीकी आमाले गाएकी थिइन् ।

साम्राज्ञी यसअधि मयंक खड्कासँग प्रेम सम्बन्धमा थिइन् । उनले खड्कासँगको सम्बन्ध तोडेर देवांशलाई साथ दिएकी थिइन् ।