इंग्लिस क्लब टोटेनहम युरोपा कन्फरेन्स लिग अन्तर्गत प्ले अफको पहिलो लेगमा पराजित भएको छ । बिहीबार भएको खेलमा पोर्चुगलको पाकोस फरेराले टोटेनहमलाई १-० ले पराजित गरेको हो ।

पाकोसको घरेलु मैदानमा भएको निकै प्रतिस्पर्धात्मक खेलमा खेलको ४५ औं मिनेटमा लुकास सिल्भाले गोल गर्दै घरेलु टोलीलाई अग्रता दिलाए । पहिलो हाफ १-० मा सकिएको खेलमा दोस्रो हाफमा दुवै टोलीबाट गोल हुन नसक्दा सिल्भाको गोलनै पाकोसलाई पहिलो लेगमा जित दिलाउन पर्याप्त रह्यो । यद्यपि, दोस्रो हाफमा दुवै टोलीले गोल गर्ने केहि सुन्दर अवसर खेर फालेका थिए ।

लिगको दोस्रो लेग टोटेनहमको घरेलु मैदानमा हुनेछ । यस प्ले अफ खेलमा जित निकाल्ने टोलीले युरोपा कन्फरेन्स लिगको समूह चरणमा स्थान बनाउने छन् । त्यस्तै गएराति नै भएको अर्को प्ले अफको पहिलो लेगमा टर्किस क्लब ट्रावजोनस्पोरलाई रोमाले २-१ ले पराजित गरेको छ ।