पार्टी फुट्ने निश्चित भएपछि हतारमा एमाले अध्यक्ष केपी शर्मा ओली पक्ष उभिएर बागमती प्रदेशको मुख्यमन्त्री बनेकी अष्टलक्ष्मी शाक्य राजीनामा गर्ने मूडमा पुगेकी छन् । गत बुधबार मात्रै मुख्यमन्त्री बनेकी शाक्यलाई एमालेबाट विभाजित भएको नेकपा ढएकीकृत समाजवादीले समर्थन नगर्ने भएपछि विश्वासको मत पाउने सम्भावना छैन ।
उनी मुख्यमन्त्री बनेकै दिनदेखि एमाले विभाजनले औपचारिकता लिएको थियो । माधव नेपाल समूहमा लामो समय काम गरेकी नेतृ शाक्य ओलीको कट्टर आलोचकको रूपमा चिनिन्थिन । पछिल्लो समय मुख्यमन्त्री पदकै लागि नेपालको साथ छोडेर ओली समूहमा आएकी शाक्य पछुताउन थालेकी छन्।
अब शाक्यसँग दुई वटा विकल्प मात्र बाँकी छन् । उनले आफ्नो सरकार टिकाइराख्नका लागि माधव नेपाल नेतृत्वको नेकपा (एकीकृत समाजवादी) दलको पक्षमा जानुपर्ने हुन्छ । कि त उनले मुख्यमन्त्रीबाट राजीनामा नै दिनुपर्छ । उनी एमालेमै बस्न चाहे प्रदेशसभा भित्र एमालेको बहुमत नपुग्ने पक्का छ । माधव नेपाल समूहका नेताहरूले अब नेपाल समूहमा खुल्न दवाव दिइरहेका बेला उनी धर्मसंकटमा परेकी छन् ।
बागमती प्रदेशसभामा हाल १ सय ९ सदस्य छन् । त्यसमा एमालेका सभामुखसहित ५६ जना सांसद छन् । सरकारमा निर्माणमा सभामुखको मत प्रयोग हुँदैन । त्यसैले एमालेको एक जना मात्र संख्या कम हुँदा शाक्य नेतृत्वको सरकार अल्पमतमा पर्छ । वााग्मती प्रदेशसभामा यसअघिदेखि नै एमालेको ओली र नेपाल समूहबीच विवाद रहँदै आएको थियो । अहिले पार्टी विभाजनका क्रममा प्रस्तावित दल एकीकृत समाजवादीतर्फ ८ सांसद खुलिसकेका छन् । सो संख्या शाक्यलाई मुख्यमन्त्री हटाउनका लागि पर्याप्त हुन्छ ।
नेपाल समुहले भने अष्टलक्ष्मी आफ्नो पार्टीमा नआएको खण्डमा उनलाई हटाएर राजेन्द्र पाण्डेलाई मुख्यमन्त्री बनाउने तयारी गरेको छ । पाण्डेलाई कांग्रेस र माओवादी केन्द्रको गठबन्धनबाट मुख्यमन्त्री बनाउने तयारी थालिएको हो। प्रदेशसभामा पाण्डेका अतिरिक्त मुनु सिग्देल, लक्ष्मण लम्साल, बसुन्धरा हुमागाईं, शान्ति पौडेल, पार्वती सिलवाल र रमा आले मगर नेपाल समूहमा खुलेका छन् ।
