अर्जेन्टिनाका महान् खेलाडी लियोनल मेसीले विहीवार विश्वकप छनोट खेलमा ह्याटट्रिक गरेर ब्राजिलका पेलेको कीर्तिमान तोडेका छन् ।

बोलिभियाविरुद्धको खेलमा उनले तीन गोल गरेका हुन् । अर्जेन्टिनाले खेल ३–० ले जितेको हो । त्यसक्रममा उनले पेलेको ७७ गोलको रेकर्ड तोडेका हुन् । मेसीको नाममा ७९ अन्तर्राष्ट्रिय गोल छ । पेलेको रेकर्ड तोडेपछि मेसीले आँसु थाम्न सकेनन् ।

ब्युनस आयर्समा २० हजार घरेलु समर्थकका अगाडि ६ पटकका बालोन डीओर विजेता मेसीले १४औं मिनेटमा गोल गरेर पेलेको बराबरी गरेका थिए । त्यसपछि ६४औं मिनेटमा उनले बोलिभियाली डिफेन्सलाई छक्याउँदै गोल गरे । अनि खेल सकिनुभन्दा दुई मिनेटअघि उनले ह्याटट्रिक पूरा गरे ।