स्पेनिस ला लिगा फुटबल अन्तर्गत आइतबार राति भएको खेलमा रियल मड्रिड विजयी भएको छ । गए राति भएको खेलमा सेल्टा भिगो रियलसँग ५-२ ले पराजित हुन पुग्यो ।

रियलको घरेलु मैदानमा भएको खेलमा खेलको चौथों मिनेटमा मिना लोरेन्जो गोल गर्दै सेल्टा भिगोलाई अग्रता दिलाएका थिए । तर, खेलको २४ औं मिनेटमा करिम बेन्जिमाले गोल गर्दै खेललाई बराबरीमा ल्याए । त्यस्तै खेलको ३१ औं मिनेटमा फ्रेन्को सर्विकको गोल मार्फत सेल्टा भिगो पहिलो हाफमा २-१ ले अघि रह्यो ।

यस्तै, व्यक्तिगत दोस्रो गोल गर्ने क्रममा बेन्जिमाले दोस्रो हाफको पहिलो मिनेटमै गोल गर्दै रियललाई पुन: बराबरीमा ल्याए । खेलको ५४ औं मिनेटमा बेन्जिमाकै पासलाई सदुपयोग गर्दै भिनिसियस जुनियरको गोल मार्फत रियल ३-२ ले अघि रह्यो । त्यसैगरी खेलको ७२ औं मिनेटमा एडुआर्डो कैमाविङ्गाले गोल गरेपछि खेलमा रियल ४-२ ले अघि रह्यो ।

त्यस्तै व्यक्तिगत तेस्रो गोल गर्ने क्रममा खेलको ८७ औं मिनेटमा पेनाल्टीमा गर्ने क्रममा बेन्जिमाले ह्याट्रिक पुरा गर्दै रियललाई ५-२ को शानदार जित दिलाए । जितसँगै रियल ४ खेलमा १० अंक जोड्दै तालिकाको शीर्ष स्थानमा छ भने १ अंक जोडेको सेल्टा भिगो रेलिगेशन जोनमा रहेको छ ।