युएई र ओमानमा जारी आईसीसी टी-ट्वान्टी विश्वकप क्रिकेट अन्तर्गत सुपर १२ को खेलमा श्रीलंका विजयी भएको छ । आइतबार भएको खेलमा बंगलादेश श्रीलंकासँग ५ विकेटले पराजित हुन पुग्यो ।

सारजाहमा टस हारेर पहिले ब्याटिङ गरेको बंगलादेशले निर्धारित २० ओभरमा ४ विकेट गुमाउदै १७१ रन बनाएको थियो । बंगलादेशका लागि मोहमद नाइमले ६२ रनको अर्धशतकीय पारी खेले भने मुस्फिकर रहिम ५२ रनमा अविजित रहे । त्यस्तै, लिटोन दासले १६ रन बनाई आउट भए भने शकिब अल हसनले १० रन जोड्दा कप्तान महमुद उल्लाह १० रनमा अविजित रहे । श्रीलंकाका लागि चामिका करुनारत्ने, बेनुरा फर्नान्डो र लाहिरु कुमाराले समान १-१ विकेट लिए ।

१७२ रनको लक्ष्य लिएर मैदान उत्रेको श्रीलंकाले १८ ओभर ५ बलमा ५ विकेट गुमाउदै पूरा गर्यो । श्रीलंकाको लागि चारिथ असलन्काले अविजित रहदै ८० रनको अर्धशतकीय पारि खेले भने भानुका राजपाक्षेले ५२ रन बनाए । यस्तै पाथुम निशन्काले २४ रन जोडे । बंगलादेशका लागि नासुम अहमेद र शकिब अल हसनले समान २-२ विकेट लिए ।

जितसँगै समूह १ को श्रीलंका २ अंक जोड्दै दोस्रो स्थानमा रहेको छ । बंगलादेश भने पाँचौं स्थानमा रहेको छ । त्यस्तै आइतबार भएको अर्को खेलमा पाकिस्तानले भारतलाई १० विकेटले पराजित गर्दै विश्वकप क्रिकेटमा शानदार सुरुवात गरेको छ । प्रतियोगिता अन्तर्गत आज अफगानिस्तान र स्कटल्याण्ड भिड्दै छन् ।