अभिनेता पल शाहले आफू र गायिका समीक्षा अधिकारीबीचको सम्बन्धको विषयमा आएको समाचारले आफूलाई दु:खी बनाएको बताएका छन् । आज एक फेसबुक स्टाटस लेख्दै आफूलाई दु:खी बनाएको बताएका हुन् ।

पलले भने ‘मैले सँधै दर्शक श्रोता मेरो घर अनि मिडियालाई आफ्नो परिवार मानेको छु र सदैव मानिरहने छु । यहि घरपरिवारको माया, आशीर्वाद र शुभेच्छाको कारणले गर्दा नै म यहाँसम्म आइपुगेको हो ।’ उनले आफू र समीक्षाबीच कुनै अनैतिक सम्बन्ध नरहेको बताए ।

‘अरु कलाकारहरूसँग जस्तै र अरुले जस्तै साङ्गीतिक सहकार्य गायिका समीक्षा अधिकारीसँग पनि भएको कुरा यहाँहरुलाई विदितै छ । हुँदै नभएका, गर्दै नगरिएका, बिना आधारका कुराहरुलाई गसिप बनाएर एउटा कलाकार र उसको व्यक्तिगत जीवनमाथि आँच आउने किसिमले लेखिएका झूटा समाचारहरूले मलाई अत्यन्तै दुःखी बनाएको छ’ फेसबुकको स्टाटसमा पलले लेखेका छन् । त्यस्तै उनले व्यक्त्तिगत प्रतिष्ठा र चरित्र हत्या हुने गरि समाचार नबनाई दिनुहुन सम्पूर्ण मिडियालाई अनुरोध समेत गरेका छन् ।

यसअघि गायिका समीक्षा अधिकारीले पनि आफू र पल शाहको बीचको सम्बन्धको विषयमा आएको समाचार प्रति आक्रोश व्यक्त गरेकी थिइन् । उनले पल शाह मेरो अभिभावक हुन् भन्दै यस्ता गलत प्रचार गर्नेहरुको पछि नलाग्न दर्शकलाई अनुरोध पनि गरेकी थिइन् ।

पलको फेसबुक स्टाटस जस्ताको त्यस्तैः
नमस्कार,
देश विदेशमा रहनुभएका सम्पुर्ण मेरा दर्शक श्रोता ज्युहरुमा हार्दिक सम्मान अनि धेरै माया । विगत केही दिनदेखि मेरो र गायिका समिक्षा अधिकारीको बिषयमा आइरहेका समाचारबाट म लगायत मेरो परिवार अनि मलाई माया गर्नुहुने सिङ्गो दर्शक दिर्घ नै दुखी बनेको महशुस हामीले गरेका छौ ।

जुनसुकै क्षेत्रमा काम गर्दा पनि केही व्यक्ति समूह कहि न कहिँ कुनै न कुनै प्रकारले नजिक हुने गर्छ । यो हामी सबैलाई थाहा भएकै कुरा हो । मेरो पेशा र विधाका कारण म धेरै मान्छेहरूसँग सहकार्य गर्नुपर्ने हुन्छ र मसँग जोडिनु हुने मेरा अग्रज, अनुज र सहकर्मीहरुमाझ मैले सदैब आफुलाई सहज र सहयोगी तवरले प्रस्तुत गरिरहेको हुन्छु ।

अरु कलाकारहरूसँग जस्तै र अरुले जस्तै साङ्गीतिक सहकार्य गायिका समिक्षा अधिकारीसँग पनि भएको कुरा यहाँहरुलाई विदितै छ । हुँदै नभएका, गर्दै नगरिएका, बिना आधारका कुराहरुलाई गसिप बनाएर एउटा कलाकार र उसको व्यक्तिगत जीवनमाथि आँच आउने किसिमले लेखिएका झूटा समाचारहरूले मलाई अत्यन्तै दुःखी बनाएको छ । यसरी कसैको व्यक्तिगत प्रतिष्ठा र चरित्र हत्या हुने गरि बदनाम गर्ने गरि समाचार नबनाई दिनुहुन सम्पूर्ण मिडियाकर्मीज्युहरुलाई हार्दिक अनुरोध गर्दछु ।

मैले सँधै दर्शक श्रोता मेरो घर अनि मिडियालाई आफ्नो परिवार मानेको छु र सदैव मानिरहने छु । यहि घर परिवारको माया, आशीर्वाद र शुभेच्छाको कारणले गर्दा नै म यहाँसम्म आइपुगेको छु । मैले जानेर नजानेर कसैको चित्त दुःखाएको छु, भने म यसैपोस्ट मार्फत हार्दिक माफी माग्दछ ।

गायिका समिक्षा अधिकारी र मेरो बीचमा भएको मित्रता र सहकार्यलाई अन्य अन्य तथानम शीर्षक दिएर सिङ्गो पत्रकारिता लाई पनि बदनाम गर्ने र हाम्रो चरित्र हत्या हुने कार्य नगरिदिनुहोला । धन्यवाद