स्पेनिस ला लिगामा बार्सिलोना विजयी भएको छ । शनिबार राति भएको खेलमा भिल्ला रियल बार्सिलोनासँग ३-१ ले पराजित हुन पुग्यो ।

भिल्ला रियलको घरेलु मैदानमा भएको खेलको पहिलो हाफ गोलरहित बराबरीमा सकिएको थियो । दोस्रो हाफको ४८ औं मिनेटमा फ्रेन्की डि जोङले गोल गर्दै बार्सिलोनालाई अग्रता दिलाएका थिए । तर खेलको ७६ औं मिनेटमा भिल्ला रियलका स्यामुअल चुक्केन्जेले गोल गर्दै खेल बराबरीमा ल्याए । त्यस्तै खेलको ८८ औं मिनेटमा मेम्फिज डिपेले गोल गर्दै बार्सिलोनालाई २–१ को अग्रता दिलाए ।

त्यसपछि खेलको इन्जुरी समयमा फिलिप कौटिन्होले पेनाल्टीमा गोल गर्दै बार्सिलोनालाई ३–१ को जित दिलाए । जितसँगै बार्सिलोना १४ खेलमा २३ अंक जोड्दै तालिकाको सातौं स्थानमा छ भने समान खेलमा १६ अंक जोडेको भिल्ला रियल १२ औं स्थानमा छ ।