स्वास्थ्य तथा जनसङ्ख्यामन्त्री विरोध खतिवडाले कोरोनाविरुद्धको दोस्रो मात्रा खोप लगाइसकेका सबैलाई तेस्रो खोपसमेत लगाउन आग्रह गरेका छन्। नेकपा (एकीकृत समाजवादी) रोशी गाउँपालिका–६ को वडा भेलालाई शनिबार सम्बोधन गर्दै ‘बुष्टर’का रुपमा दोस्रो मात्रा खोप लगाएकालाई तेस्रो खोप लगाउन आग्रह गरेका हुन्। उनले कोरोना भाइरसविरुद्धको दुई करोड खोपको मात्रा मौज्दात रहेको पनि बताए।

मन्त्री खतिवडाले नेपालमा कोरोना सङ्क्रमणको तेस्रो लहरको जोखिम बढिरहेका बेला तेस्रो खोप लगाउन अनिवार्य भइसकेको बताए। ‘कोरोनाको तेस्रो लहरको जोखिम बढिसक्यो, स्वास्थ्य मापदण्ड कायमै राख्नुस्, अनि खोप अनिवार्य लगाउनुहोला’, उनले भने।

मन्त्री खतिवडाले हालसम्म ६ हजार केन्द्रबाट खोप लगाउने काम भइरहेको उल्लेख गर्दै आगामी पुस १ गतेदेखि १९ हजार केन्द्रमा खोपको व्यवस्था गरिने बताए। उनले भने, ‘खोप जत्ति पनि उपलब्ध भएकाले लगाउन स्वास्थ्य केन्द्र जान सबैमा आग्रह गर्छु।’

मन्त्री खतिवडाले फरक प्रसङ्गमा निर्वाचनलगायत गतिविधिमा वामपन्थी एक भएर अघि बढ्ने जिकिर गरे।