इंग्लिस प्रिमियर लिग फुटबलमा आर्सनल विजयी भएको छ । बुधबार राति भएको खेलमा आर्सनलले वेस्ट ह्याम युनाईटेडलाई २-० ले पराजित गरेको हो ।

पहिलो हाफ गोलरहित बराबरीमा सकिएको खेलमा दोस्रो हाफमा आर्सनलले २ गोल गरेको थियो । आर्सनलको लागि गाब्रियल मार्टिनेली र इमिल स्मिथले समान १-१ गोल गरे । खेलको ४८ औं मिनेटमा मार्टिनेलीले गोल गर्दै आर्सनललाई अग्रता दिलाएका थिए । खेलको ६७ औं मिनेटमा वेस्ट ह्याम भ्लादमिर काउफलले रातो कार्ड पाएपछि टोली १० खेलाडीमा समेटिएको थियो । त्यसपछि खेलको ८७ औं मिनेटमा इमिलले गोल गर्दै आर्सनललाई २-० को सहज जित दिलाए । यसअघि खेलको ६९ औं मिनेटमा आर्सनलका एलेक्सजेन्ड्रा लाकाजेट्टीले पेनाल्टीमा गोल गर्न सकेनन् ।

जितसँगै आर्सनल १७ खेलमा २९ अंक जोड्दै तालिकाको चौथों स्थानमा उक्लिएको छ भने २८ अंक जोडेको वेस्ट ह्याम पाँचौं स्थानमा झरेको छ । त्यस्तै इंग्लिस प्रिमियर लिग अन्तर्गत नै बुधबार राति भएको अन्य खेलमा खेलमा ब्राइटन उल्भ्ससँग १-० ले पराजित हुँदा साउथह्याम्पटन र क्रिस्टल प्यालेसले २-२ गोलको बराबरी खेलेका छन् ।