बंगलादेशमा जारी एसियन सिनियर सेन्ट्रल जोन पुरुष तथा महिला भलिबल च्यालेन्ज कपअन्तर्गत महिला तर्फको उपाधिका लागि नेपाली टोली आज उज्वेकिस्तानसँग भिड्दै छ। ढाका मिरपुरस्थित शाहिद शुरवार्दी इन्डोर स्टेडियममा नेपाल र उज्वेकिस्तानबीचको खेल ११ः१५ बजे सुरु हुनेछ।

साविक विजेता नेपाल उज्वेकिस्तानलाई हराएर उपाधि जित्ने योजनामा रहेको छ। नेपाली टोली जारी प्रतियोगितामा अपराजित रहेको छ।

राउण्ड रोबिनको लिग खेलमा नेपालले उज्वेकिस्तानलाई ३–० को सोझो सेटमा हराएको थियो। नेपाल शीर्ष स्थानमा रहेर फाइनल पुगेको हो भने उज्वेकिस्तान दोस्रो स्थानमा रहँदै फाइनल पुगेको हो। आजै नेपालले पुरुषतर्फ तेस्रो स्थानका लागि उज्वेकिस्तानसँग खेल्नेछ।