बिग बास लिग (बीबीएल) टी-ट्वान्टी क्रिकेटमा सन्दीप लामिछाने आवद्ध टिम होबर्ट हुरिकेन्स परजित भएको छ । शनिबार भएको खेलमा होबर्टले ब्रिसबेन हिटसँग १४ रनले पराजित हुन पुग्यो ।

अष्ट्रेलियाको होबर्टमा टस हारेर पहिले ब्याटिङ गरेको ब्रिसबेनले निर्धारित २० ओभरमा ८ विकेट गुमाउदै १५० रन बनाएको थियो । ब्रिसबेनका लागि जेम्स बाज्लेले अविजित रहँदै ४४ रन बनाए भने ज्याक विल्डरमुथले २८ रन जोड्दा साम हेअलेटले २४ रन बनाए । होबर्टका लागि नाथन एलिसले ३ विकेट लिए भने टम रोजर्सको भागमा २ विकेट रह्यो । त्यस्तै नेपाली लेग स्पिनर सन्दीप लामिछानेले ४ ओभरमा ३७ रन खर्चिएर १ विकेट लिए । जारी सिजनमा सन्दीपको यो छैटौं विकेट हो ।

१५१ रनको लक्ष्य लिएर मैदान उत्रेको होबर्टले २० ओभरमा ८ विकेट गुमाएर १३६ रन मात्र बनाउन सक्यो । होबर्टका लागि टम रोजर्सले ३३ रनमा अविजित रहे भने डार्सी शर्टले २७ रन बनाए । त्यस्तै ह्यारी ब्रुक २२ बनाई आउट भए भने नाथन एलिसले १८ रन जोडे । ब्रिसबेनका लागि जाभियर बार्टलेटले ४ विकेट लिए भने मुजिब उर रहमानको भागमा ३ विकेट रह्यो ।

खेलको म्यान अफ दि म्याच जाभियर ब्राटलेट भए । हारसँगै होबर्ट ८ खेलमा १७ अंक जोड्दै तालिकाको तेस्रो स्थानमा छ भने समान खेलमा १४ अंक जोडेको ब्रिसबेन पाचौं स्थानमा रहेको छ ।