नेपाली काँग्रेसका सभापति एवं प्रधानमन्त्री शेरबहादुर देउवाले एकताबद्ध भएर गठबन्धनका उम्मेदवारको पक्षमा मतदान गर्न आग्रह गरेका छन् । आज (बिहीबार) भरतपुरमा आयोजित पाँचदलीय गठबन्धनको चुनावी सभालाई सम्बोधन गर्दै उनले यस्तो बताएका हुन् ।

उनले भरतपुर महानगरपालिका मेयरकी उम्मेदवार रेनु दाहालका लागि भोट माग्दै कुनै पनि शंका नहुनेगरी सहयोग गर्न नेता तथा कार्यकर्तालाई आग्रह गरेका छन् । ‘रेनु दाहालजीलाई कुनै पनि शंका नहुनेगरी सहयोग गर्नुहोस् । उहाँले पाँच वर्षमा गरेको विकास हेर्नुहोस् । त्यसका लागि म उहाँलाई धन्यवाद दिन चाहन्छु’ देउवाले भने ।

त्यस्तै उनले उनले गठबन्धन टुटाउन ठुलो षड्यन्त्र रहेको बताउँदै भरतपुरबाट त्यो षड्यन्त्रलाई कुनै हालतमा सफल हुन नदिने बताए ।​ देशभरीकै पालिकामध्ये भरतपुर महानगरपालिकामा बेरुजु कम भएको, प्रत्येक गल्लीमा कालोपत्रे सडक बनेको भन्दै रेणुलाई कुनै पनि अवस्थाबाट सहयोग गर्न आग्रह गरे । देउवाले भने , ‘बेरूजु नहुने एक मात्र नगरपालिका भरतपुर हो । अरु नगरपालिकामा धेरै बेरूजु छ ।’ आफ्नै पार्टीका केही नेताले बखेडा नझिकेको भए रेणुले मेयरमा अहिले नै चुनाव जितिसकेको प्रधानमन्त्री देउवाको भनाइ छ । देउवाले भने ‘उहाँले जितिसक्नु भएको छ । तर, के गर्ने मेरै पार्टीका साथीहरूले बखेडा झिक्नुभएको छ ।’