नेपाली काँग्रेसका सभापति एवं प्रधानमन्त्री शेरबहादुर देउवाले गठबन्धन राष्ट्रिय आवश्यकता भएको बताएका छन् । आज (आइतबार) पाँच दलीय गठबन्धनद्वारा पोखरामा आयोजित चुनावी सभालाई सम्बोधन गर्दै उनले यस्तो बताएका हुन् ।

उनले गठबन्धन काँग्रेसका लागि सबैभन्दा बढी आवश्यक भएको भन्दै बलियो बनाएर लैजानुपर्छ बताए । ‘गठबन्धन बन्नु अघि हाम्रो कस्तो अवस्था थियो, आज काँग्रेसको नेतृत्वमा सरकार छ सबै पार्टी मिलाएर बसेको छ ।’ देउवाले भने, ‘गठबन्धनमा शङ्का, उपशङ्का गर्नुपर्ने अवस्था नरहेको जनाउँदै उनले नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ र नेकपा (एकीकृत समाजवादी) अध्यक्ष माधव नेपाल एवं गठबन्धनका दलले उदार भएर काँग्रेसलाई सहयोग गरेका छन् ।’

उनले गठबन्धनले छ महानगरमध्ये तीनवटा महानगरको नेतृत्व काँग्रेसलाई दिएको बताए । महानगर मात्र नभई हरेक पालिकामा गठबन्धनलाई विजयी बनाउन प्रधानमन्त्री देउवाले आग्रह गरे । गठबन्धनलाई विजयी बनाउनका लागि काँग्रेसी कार्यकर्ता गठबन्धनका अन्य दललेभन्दा पनि मेहनतका साथ लाग्नुपर्नेमा उनले जोड दिए ।