नेपाली कांग्रेसका सभापति तथा प्रधानमन्त्री शेरबहादुर देउवाले गठबन्धनले काँग्रेस कमजोर नभएको बताएका छन् । आज (शुक्रबार) मतदान गरेपछि प्रतिक्रिया दिँदै उनले यस्तो बताएका हुन् ।

उनले स्थानीय तह निर्वाचनले लोकतन्त्र बलियो बनाएको भन्दै काँग्रेस गठबन्धनले कमजोर नभएको जिकिर गरे । ‘निर्वाचन हुँदैन भन्ने शक्तिहरू पनि सामेल भएका छन् । स्थानीय तहको समृद्धि र विकासका लागि निर्वाचन महत्वपूर्ण थियो । अहिले निर्वाचन भएको छ,’ उनले भने ।

प्रधानमन्त्री देउवाले डडेल्धुरा गन्यापधुरा गाउँपालिकाको रुवाखोलास्थित असिग्राम मावि मतदान केन्द्र ‘ख’ बाट मतदान गरेका हुन् । मतदानका लागि प्रधानमन्त्री देउवा शुक्रबार बिहानै धनगढीबाट डडेल्धुरा पुगेका थिए ।