नुवाकोट जिल्लाको बेलकोटगढी नगरपालिका वडा नम्बर ११ मा नेपाली कांग्रेसको प्यानल नै विजयी भएको छ । मंगलबार साँझ सम्पन्न मतगणनाको अन्तिम परिणाम अनुसार बेलकोटगढी नगरपालिका– ११ को वडाअध्यक्षमा नेपाली कांग्रेसका प्रकाशजंग पाण्डेको सम्पूर्ण प्यानल नै विजयी भएको हो ।
पाण्डेले कुल ७१४ मत प्राप्त गरी विजयी हुँदा उनको निकटतम प्रतिस्पर्धी नेकपा माओवादी केन्द्रका प्रेमबहादुर तामाङले ४७६ मत ल्याएका थिए । त्यस्तै , वडा अध्यक्षकै अर्का प्रतिस्पर्धी नेकपा एमालेका नवराज तिवारीले ४३० मत प्राप्त गरेका थिए ।
यस्तै उक्त वडामा कांग्रेसकै तर्फबाट निर्वाचित भएका वडा सदस्यहरुमा राजुमान लामा, टिकाराम तामाङ, सरिता तिवारी, चंखमाया सुनारसहित सम्पूर्ण प्यानल नै विजयी भएका हुन । यसभन्दा अघिल्लो निर्वाचनमा यस नगरपालिकामा मेयर र वडा अध्यक्ष लगायत अधिकांश पदमा नेकपा एमालेले जितेको थियो । अहिलेसम्मको मत परिणाम अनुसार एमाले तेस्रो स्थानमा रहेको छ ।
