ककनीमा मुख्य उत्पादन स्ट्रबेरीलाई अन्तर्राष्ट्रियस्तरमा बजारीकरण गर्ने उद्देश्यले किवानिस क्लब अफ ककनी स्ट्रबेरी नामक संस्था दर्ता गर्ने अभिप्रायले हालै एक अन्तरक्रिया कार्यक्रम सम्पन्न भएको छ । गत शुक्रबार सम्पन्न पहिलो अन्तरक्रिया कार्यक्रममा ककनी गाउँपालिकाका मेयर सुमन तामाङ, ककनी गाउँपालिका वडा नं. २ का वडाध्यक्ष तिलकबहादुर लामालगायत स्थानीयाहरुको उपस्थिति रहेको थियो ।

अन्तरक्रियामा ककनीमा उत्पादित स्ट्रबेरीलाई अन्तर्राष्ट्रिय स्तरमा बजारीकरण गर्न एक क्लब दर्ता गरी सोही क्लबका मध्यमबाट ककनीको लोकप्रिय उत्पादनलाई अन्तर्राष्ट्रिय जगत्मा चिनाउन मद्दत पुग्ने कुरामा एकमत देखिएको थियो । ककनी स्ट्रबेरी फर्मका संचालक छेसांङ तामाङले क्लबको माध्यमबाट ककनीको प्रोडक्ट स्ट्रबेरीलाई अन्तर्राष्ट्रिय जगत्सम्म चिनाउन सहज हुने बताए ।

किवानिस क्लब अफ काठमाडौँ नेपालले आयोजना गरेको कार्यक्रममा उपस्थित अतिथिहरुलाई स्ट्रबेरीका पातको माला लगाइएको थियो ।उक्त कार्यक्रममा ककनी गाउँपालिका वडा नं. २ मा रहेको श्री सूर्य प्राविका विद्यार्थीहरुलाई स्टेसनरी सामानहरु पनि वितरण गरिएको थियो ।