नवकान्तिपुर संवाददाता
काठमाडौं, २९ मंसिर ।
पछिल्लो चौबीस घण्टामा नेपालमा ४ जनामा कोरोना भाइरसको संक्रमण पुष्टि भएको छ भने कसैको पनि मृत्यु भएको छैन । स्वास्थ्य तथा जनसंख्या मन्त्रालयका अनुसार देशभरका विभिन्न प्रयोगशालामा ७३० जनाको नमूना परीक्षण गरिएको थियो । जसमा २१९ जनाको पीसीआर परीक्षण गर्दा ३ जना र ५११ जनाको एन्टिजेन परीक्षण गर्दा १ जनामा कोरोना पुष्टि भएको छ ।
त्यस्तै, चौबीस घण्टामा कोरोनाका कारण कसैको पनि मृत्यु भएको छैन । नेपालमा हाल मृत्यु हुनेको संख्या १२ हजार १९ पुगेको मन्त्रालयले जनाएको छ । यस्तै आज ४ जना कोरोना संक्रमित निको भई डिस्चार्ज भएका छन् । योसँगै हालसम्म निको हुनेको संख्या ९ लाख ८८ हजार ९११ जना पुगेको छ ।
नेपालमा हाल सक्रिय संक्रमितको संख्या १५ रहेको छ । यससँगै देशभर कोरोना संक्रमितको कुल संख्या पीसीआर विधिबाट १० लाख ९४५ र एन्टिजेन विधिबाट १ लाख ५२ हजार २१५ जना पुगेको छ ।
