देशका विभिन्न स्थानबाट मृत अवस्थामा ९ जना फेला परेका छन् । रुकुम पश्चिम, आठबिसकोट नगरपालिका-६ ज्यामिरे बस्ने कर्ण बहादुर बोहोराकी छोरी १३ वर्षीया धनिसा बोहोरा सोही नगरपालिका-६ कोट ज्यामिरे पाखामा शनिबार मृत अवस्थामा फेला परेकी छन् ।
शुक्रबार बिहानदेखि घरबाट हराई बेपत्ता भएकी उनको खोजी गर्ने क्रममा उक्त पाखामा शव फेला परेको हो । त्यस्तै दाङ, घोराही उपमहानगरपालिका-८ सौडीगाउँ बस्ने ७० वर्षीय हिमलाल चौधरी सोहीठाउँ सौडी सोतास्थित जमेको पानीमा शनिबार मृत अवस्थामा फेला परेका छन् । यता दार्चुला, शैल्यशिखर नगरपालिका-९ गोकुलेश्वरस्थित चौलानी नदीको किनारामा सोही नगरपालिका-२ तौंकी बस्ने २२ वर्षीया धनमती भट्ट शनिबार मृत अवस्थामा फेला परेकी छिन् ।
यस्तै गोरखा, सिरानचोक गाउँपालिका-४ ब्राहबिसेस्थित गोरेटो बाटो छेउमा सोही गाउँपालिका-४ माझगाउँ बस्ने ६५ वर्षीय सिताराम पोखरेल शनिबार मृत अवस्थामा फेला परेका छन् । त्यसैगरी गुल्मी, मदाने गाउँपालिका-७ रोल्मा बस्ने ७४ वर्षीय सेते सार्की सोही ठाउँस्थित जंगलमा शनिबार मृत अवस्थामा फेला परेका छन् । यसैगरी मोरङ, सुनवर्षी नगरपालिका-९ भेरुवाथान बस्ने ५५ वर्षीय देविलाल सरदार आफ्नै घरमा आइतबार मृत अवस्थामा फेला परेका छन् ।
यता काठमाडौं, तारकेश्वर नगरपालिका-४ दगुर्नेपानीस्थित टहरोमा हाल नाम, थर, वतन नखुलेका अन्दाजी ३२ वर्षीय पुरुष शनिबार मृत अवस्थामा फेला परेका छन् । त्यस्तै रुपन्देही, मायादेवी गाउँपालिका-७ बौरिहवास्थित माछा पोखरीमा हाल नाम, थर, वतन नखुलेका अन्दाजी ३० वर्षीय पुरुष शनिबार मृत अवस्थामा फेला परेका छन् ।
यसैगरी चितवन, इच्छाकामना गाउँपालिका-४ कुरिनटार धारापानीस्थित त्रिशुली नदीको किनारमा हाल नाम, थर, वतन नखुलेका अन्दाजी ३२ वर्षीय पुरुष शनिबार मृत अवस्थामा फेला परेका छन् । यस सम्बन्धमा प्रहरीले थप अनुसन्धान गरिरहेको छ ।
