नवकान्तिपुर संवाददाता
काठमाडौं, २५ चैत ।
काठमाडौँ महानगरपालिकाका मेयर बालेन्द्र साह (बालेन) ले इन्डिया र चाइनाले बनाएको सरकारको आफूले कुनै इज्जत नगर्ने बताएका छन् । आज(शुक्रबार) सामाजिक सञ्जाल फेसबुकमा एक स्टाटस लेख्दै उनले यस्तो बताएका हुन् ।
सरकारमाथि खनिएका उनले आक्रोशित रूपमा अभिव्यक्ति दिएका हुन् । त्यस्तै मेयर साहले नेपाल कहिले स्वाधिन हुने भन्दै प्रश्न गरेका छन् ।
बालेनले फेसबुकमा लेखेका छन्, ‘इन्डिया र चाइनाले बनाएको सरकारको कुनै इज्जत गर्दिन म । नेपाल स्वाधीन कहिले हुने ? आफ्नो अस्तित्व कहिले बनाउने लाज लाग्दैन ?’
त्यसअघि आजै मेयर साहले एक ट्विट गर्दै आजबाट सिंहदरबारको फोहोर नउठाउने भन्दै त्यहाँका नेतालाई नै सिसडोलमा फाल्नुपर्ने समय आएको बताएका थिए । उनले ट्विटमा लेखेका छन्, ‘आजबाट सिंहदरबारको फोहर उठ्दैन, त्यहाँका नेताहरूले सिस्डोलमा डम्प गर्नुपर्ने हुन्छ ।’
