देशका विभिन्न स्थानबाट मृत अवस्थामा ५ जना फेला परेका छन् । रुपन्देही, मायादेवी गाउपालिका-२ पिपराहवा बस्ने २४ वर्षीय पिन्टु लोध सोही ठाउँस्थित कोइलाहवा नदीको सुख्खा नालामा शुक्रबार मृत अवस्थामा फेला परेका छन् ।

त्यस्तै महोत्तरी, सम्सी गाउँपालिका-६ सम्सीटोलस्थित पोखरीमा सोही ठाउँ बस्ने १९ वर्षीय धर्मेन्द्र महत्तो शनिबार मृत अवस्थामा फेला परेका छन् । शुक्रबार दिउँसो पोखरीमा नुहाउने क्रममा डुबेर बेपत्ता भएको भन्ने खबर प्राप्त हुनासाथ प्रहरी चौकी सम्सीबाट खटिएको प्रहरीले खोजी गर्ने क्रममा शव फेला पारेको हो ।

यस्तै काठमाडौं, दक्षिणकाली नगरपालिका-१ स्थित चाल्ना खेलमा हाल नाम, थर, वतन नखुलेका करिब ४५ वर्षीय पुरूष शुक्रबार मृत अवस्थामा फेला परेका छन् । यसैगरी काठमाडौं महानगरपालिका-९ सिनामंगल भत्केको पुल नजिक हाल नाम, थर, वतन, नखुलेका करिब ४५ वर्षीय पुरुष शुक्रबार मृत अवस्थामा फेला परेका छन् ।

यता चितवन, भरतपुर महानगरपालिका-५ रामबाग बस्ने ५५ वर्षीय राम बहादुर गुरुङ आफ्नै घरमा शुक्रबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।