देशका विभिन्न स्थानबाट मृत अवस्थामा ४ जना फेला परेका छन् । सर्लाही, मंलगवा नगरपालिका-१० स्थित ज्ञान कुन्ज बोडिङ स्कुलका शिक्षक बरहथवा नगरपालिका-१८ श्रीपुर घर भएका २६ वर्षीय रामाशंकर यादव सोही स्कुलको होस्टलमा बुधबार मृत अवस्थामा फेला परेका छन् ।

त्यस्तै इलाम, इलाम नगरपालिका-३ सुनुवार गाउँ बस्ने ६२ वर्षीय यम बहादुर सुनुवार सोही ठाउँस्थित खोल्सीमा बुधबार मृत अवस्थामा फेला परेका छन् । यता रूपन्देही, तिलोत्तमा नगरपलिका-१६ पूर्वी बहियास्थित कोही नबस्ने खाली घरभित्र नवलपरासी सुनवल नगरपालिका-७ सिसनी बस्ने १८ वर्षीय सुमन कंवर मंगलबार मृत अवस्थामा फेला परेका छन् ।

घटना सम्बन्धमा थप अनुसन्धानको लागि प्रहरीले १ जनालाई नियन्त्रणमा लिएको छ । यस्तै पर्सा, वीरगंज महानगरपालिका-८ स्थित बिएनबि क्याफे नजिक बाटो छेउमा हाल नाम, थर, वतन नखुलेका अन्दाजी ४५ वर्षीय पुरुष मंगलबार मृत अवस्थामा फेला परेका छन् । यस सम्बन्धमा प्रहरीले थप अनुसन्धान गरिरहेको छ ।