देशका विभिन्न स्थानबाट मृत अवस्थामा १० जना फेला परेका छन् । प्युठान, स्वर्गद्वारी नगरपालिका-८ मौधारास्थित खरयानको झाडीमा सोही नगरपालिका-९ दिबाङ बस्ने ५० वर्षीय चुमा घर्ती आइतबार मृत अवस्थामा फेला परेकी छन् ।

त्यस्तै बागलुङ, बडिगाड गाउँपालिका-९ थालखर्क बस्ने तुम बहादुर केसीको घरमा बास बसेका गुल्मी इस्मा गाउँपालिका-अर्जे घर भएका ४२ वर्षीय टंक बहादुर बिक सोही घरमा आइतबार मृत अवस्थमा फेला परेका छन् ।यता सोलुखुम्बु, महाकुलुङ गाउँपालिका-४ शाब्दी बस्ने ४५ वर्षीया मक्लमनी राई सोही ठाउँस्थित कङ्खु खोलाको बिचमा आइतबार मृत अवस्थामा फेला परेकी छन् ।

यस्तै अर्घाखाँची, शितगंगा नगरपालिका-८ भुतहाखोलामा हाल नाम, थर, वतन नखुलेकी अन्दाजी ६० वर्षीया महिला आइतबार मृत अवस्थामा फेला परेकी छन् । उता महोत्तरी, बर्दिबास नगरपालिका-११ बाँके जंगलस्थित यात्रु प्रतिक्षालयमा हाल नाम, थर, वतन नखुलेका पुरुष आइतबार मृत अवस्थामा फेला परेका छन् ।

यता सिन्धुपाल्चोक, मेलम्ची नगरपालिका-४ सानो मुसुरे बस्ने ३५ वर्षीया कमला बन्जारा आफ्नै घरमा शनिबार मृत अवस्थामा फेला परेकी छन् । यसैगरी कञ्चनपुर, लालझाडी गाउँपालिका-४ जाँई बस्ने ४५ वर्षीय करन सिंह साउँद सोही ठाउँस्थित दोदा नदीको किनारामा शनिबार मृत अवस्थामा फेला परेका छन् ।

त्यसैगरी मुगु, छाँयानाथ रारा नगरपालिका-३ तलितुमस्थित सडकमा सोही नगरपालिका-३ देउवाडा गाँउ बस्ने २२ वर्षीय बिश्वनाथ रोकाय आइतबार मृत अवस्थामा फेला परेका छन् । त्यस्तै भक्तपुर, सुर्यबिनायक नगरपालिका-८ गणेश मन्दिर नजिक जंगलमा हाल नाम, थर, वतन, नखुलेका पुरुष शनिबार मृत अवस्थामा फेला परेका छन् ।

उता बैतडी, पाटन नगरपालिका-२ थलकुडा बस्ने ४० वर्षीया लक्ष्मी ऐर सोही ठाउँस्थित महादेउ भिरबाट करिब २ सय मिटर तल शनिबार मृत अवस्थामा फेला परेकी छन् । सबै घटनाका सम्बन्धमा प्रहरीले आवश्यक अनुसन्धान गरिरहेको छ ।