देशका छुट्टाछुट्टै स्थानमा भएको सवारी दुर्घटनामा तीन जनाको मृत्यु भएको छ । रौतहट, गरुडा नगरपालिका-८ स्थित पाल पेट्रोल पम्प नजिक सडकमा प्र.२-०१- ००१ च ००६३ नम्बरको म्याजिकले बीआर ३० डब्लु ७१३९ नम्बरको स्कुटरललाई ठक्कर दिँदा स्कुटर चालक भारत सितामडी ग्राम पंचाईत बरगिनिया-१३ बस्ने ३५ वर्षीय चन्दन कुमारको मंगलबार दिउँसो मृत्यु भएको छ ।

ठक्करबाट गम्भीर घाइते भएका उनको उपचारको लागि अस्पतालतर्फ लैजाने क्रममा बाटोमै मृत्यु भएको हो । हाल फरार म्याजिक चालकको प्रहरीले खोजी गरिरहेको छ । त्यस्तै महोत्तरी, एकडारा गाउँपालिका-२ कटैया बेलास्थित सडकमा ज.७ प ८६३१ नम्बरको मोटरसाइकलको ठक्करबाट सोही ठाउँ बस्ने ५५ वर्षीया सुवधी देवी साहको मंगलबार राति मृत्यु भएको छ ।

ठक्करबाट गम्भीर घाइते भएकी उनको जानकी हेल्थ केयर जनकपुरमा उपचारको क्रममा मृत्यु भएको हो । मोटरसाइकल चालकलाई प्रहरीले नियन्त्रणमा लिएको छ । यस्तै धादिङ, थाक्रे गाउँपालिका-६ महादेववेशीमा एनएल ०१९१ एजी ७४१२ भारतीय नम्बरको गाडीको ठक्करबाट पैदलयात्री थाक्रे गाउँपालिका-१ कार्कीडाँडा बस्ने करिब ६२ वर्षीय श्यामे भनेर चिनिने पुरुषको गएराति मृत्यु भएको छ ।

उपचारको लागि काठमाडौंतर्फ लैजाने क्रममा उनको बाटोमै मृत्यु भएको हो । गाडी चालकलाई प्रहरीले नियन्त्रणमा लिएको छ । सवै दुर्घटनाको सम्बन्धमा प्रहरीले थप अनुसन्धान गरिरहेको छ ।