देशका छुट्टाछुट्टै स्थानमा भएको सवारी दुर्घटनामा दुई जनाको मृत्यु भएको छ । दाङ, शान्तिनगर गाउँपालिका-३ भलामेटीस्थित सडकमा भलामेटीबाट जुम्लीकुलातर्फ जाँदै गरेको रा.२ प ४३७२ नम्बरको मोटरसाइकल आफै अनियन्त्रित भई शुक्रबार राति दुर्घटना हुँदा चालक सोही गाउँपालिका-३ बस्ने २८ वर्षीय सम्राट भन्ने खगेन्द्र वलीको मृत्यु भएको छ ।

दुर्घटनामा गम्भीर घाइते भएका उनको राप्ती प्रादेशिक अस्पताल तुलसीपुरमा उपचारको क्रममा मृत्यु भएको हो । पाँचथर, फिदिम नगरपालिका-११ फेवादिनस्थित सडकमा नागिनबाट फिदिमतर्फ जाँदै गरेको प्रदेश १-०३-००१ प ५२७१ नम्बरको स्कुटर आफै अनियन्त्रित भई शनिबार बिहान दुर्घटना हुँदा स्कुटरमा सवार सोही नगरपालिका-१ बस्ने ६५ वर्षीया माया देवी कार्कीको मृत्यु भएको छ ।

दुर्घटनामा गम्भीर घाइते भएकी उनको जिल्ला अस्पतालमा उपचारको क्रममा मृत्यु भएको हो । साथै दुर्घटनामा घाइते भएका स्कुटर चालकको सोही अस्पतालमा उपचार भइरहेको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।