देशका विभिन्न स्थानबाट मृत अवस्थामा ९ जना फेला परेका छन् । धनुषा, जनकपुर उपमहानगरपालिका-७ स्थित अन्नपूर्ण होटेलको कोठामा मोरङ बेलबारी नगरपालिका-४ बस्ने को.१ ख ४९९८ नम्बरको बसको सह-चालक ४८ वर्षीय दिपक पौडेल आइतबार मृत अवस्थामा फेला परेका छन् ।

उनीसँगै बसेका उक्त बसको चालकलाई सोधपुछ तथा आवश्यक अनुसन्धानको लागि प्रहरीले नियन्त्रणमा लिएको छ । त्यस्तै मोरङ, सुन्दरहरैचा नगरपालिका-१२ स्थित १६ नम्बर बाटोको पैनीमा भारत उत्तर प्रदेश मुराद वाद बस्ने २४ वर्षीय साजिक खान गएराति मृत अवस्थामा फेला परेका छन् ।

यस्तै ओखलढुंगा, खिजिदेम्वा गाउँपालिका-७ ठाडो खोलामा सोही ठाउँ बस्ने ७१ वर्षीय कटक बहादुर सुनुवार आइतबार मृत अवस्थामा फेला परेका छन् । यता दाङ, घोराही उपमहानगरपालिका-११ झमरे बस्ने ६४ वर्षीय तिलकराम बिक सोही ठाउँस्थित हापुर खोलाको किनारमा आइतबार मृत अवस्थामा फेला परेका छन् । घोराही उपमहानगरपालिका-११ झमरेस्थित पत्रे खोलाले बगाएको भन्ने खबर प्राप्त हुनासाथ अस्थायी प्रहरी पोष्ट बेलझुण्डी र ईलाका प्रहरी कार्यालय मलवारबाट खटिएको प्रहरीले खोजी गर्ने क्रममा घटनास्थल भन्दा करिब ७ किमि दक्षिणतर्फ हापुर खोलाको किनारमा उनको शव फेला पारेको हो ।

त्यसैगरी मकवानपुर, भिमफेदी गाउँपालिका-८ माण्डुस्थित बागमती खोलामा हाल नाम, थर, वतन नखुलेका करिब ३५ वर्षीय पुरुष आइतबार मृत अवस्थामा फेला परेका छन् । यसैगरी काभ्रे, मण्डनदेउपुर नगरपालिका-९ कुवापानी बस्ने ५० वर्षीय सानाकान्छा सार्की सोही ठाउँस्थित कुन्तावेसीबाट चण्डेनीजाने सडक छेउको नालीमा शनिबार मृत अवस्थामा फेला परेका छन् ।

उता कास्की, पोखरा महानगरपालिका-१७ पावरहाउसमा सोही महानगरपालिका-१४ बस्ने स्याङ्जा अर्जुनचौपारी गाउँपालिका-२ घर भएका ४५ वर्षीय कर्ण बहादुर केसी र सोही महानगरपालिका-१८ रातोडाँडा फेवाताल किनारमा हाल नाम, थर, वतन नखुलेका अन्दाजी ३६ वर्षीय पुरुष शनिबार मृत अवस्थामा फेला परेका छन् ।

यता सुनसरी, इटहरी उपमहानगरपालिका-९ स्थित राधाकृष्ण मन्दिरको पछाडि नालीमा हाल नाम, थर, वतन नखुलेका अन्दाजी ५५ वर्षीय पुरुष शनिबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।