देशका छुट्टाछुट्टै स्थानमा भएको सवारी दुर्घटनामा दुई जनाको मृत्यु भएको छ । धनुषा, मिथिला नगरपालिका-७ स्थित सडकमा प्र.१-०१-००१ च ८६३९ नम्बरको बोलेरो पिकअप र प्र ०२-०२-००४ प २१९२ नम्बरको मोटरसाइकल एकआपसमा ठक्कर खाई गएराति दुर्घटना हुँदा मोटरसाइकलमा सवार लक्ष्मीनिया गाउँपालिका-७ घर भई जनकपुर उपमहानगरपालिका-९ बस्ने २३ वर्षीय ओम कुमार रामको मृत्यु भएको छ ।

दुर्घटनामा गम्भीर घाइते भएका उनको ढल्केबर अस्पतालमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार १ जनाको सोही अस्पतालमा उपचार भइरहेको छ । पिकअप चालकलाई प्रहरीले नियन्त्रणमा लिएको छ ।

त्यस्तै उदयपुर, चौदण्डीगढी नगरपालिका-१० स्थित सडकमा ना.६ त ६६१८ नम्बरको ट्याक्टर अनियन्त्रित भई शुक्रबार बिहान दुर्घटना हुँदा ट्याक्टरमा सवार धनुषा मिथिला नगरपालिका-११ बस्ने १७ वर्षीय सुरज मगरको मृत्यु भएको छ । दुर्घटनामा गम्भीर घाइते भएका उनको धरान घोपामा उपचारको क्रममा मृत्यु भएको हो ।

साथै दुर्घटनामा घाइते भएका ट्याक्टरमा सवार अन्य ३ जनाको सोही अस्पतालमा उपचार भइरहेको छ । ट्याक्टरचालकलाई प्रहरीले नियन्त्रणमा लिएको छ । दुबै दुर्घटनाका सम्बन्धमा प्रहरीले थप अनुसन्धान गरिरहेको छ ।