देशका विभिन्न स्थानबाट मृत अवस्थामा ७ जना फेला परेका छन् । काठमाडौं, नागार्जुन नगरपालिका-४ बाफलस्थित ईलाम मेची गेष्ट हाउसको कोठमा नुवाकोट खर्कभञ्याङ घर भएका ४१ वर्षीय यम बहादुर कार्की आइतबार मृत अवस्थामा फेला परेका छन् ।

त्यस्तै रूपन्देही, मायादेवी गाउँपालिका-२ महदेवा घर भई सिद्धार्थनगर नगरपालिका-८ कान्छी बजारमा भरियाको काम गरी बस्ने २८ वर्षीय बर्खु सहानी बजारको स्टलभित्र आइतबार मृत अवस्थामा फेला परेका छन् । यता नलवपरासी पश्चिम, सरावल गाउँपालिका-१ बासास्थित भुलही खोलाको छेउमा सुनवल नगरपालिका-११ धुर्कोटफेदी बस्ने २९ वर्षीय बिर बहादुर कुमाल आइतबार मृत अवस्थामा फेला परेका छन् ।

यस्तै दाङ, राजपुर गाउँपालिका-३ गोबरडियास्थित राप्ती नदीको किनारमा हाल नाम, थर, वतन, उमेर नखुलेका मानिसको शव सडीगलेको अवस्थामा आइतबार फेला परेको छ । उता रूपन्देही, सैनामैना नगरपालिका-१० भच्कई बस्ने ४१ वर्षीय धन बहादुर पुन साहनी मगर आफ्नै कोठामा शनिबार मृत अवस्थामा फेला परेका छन् ।

यता मकवानपुर, हेटौंडा उपमहानगरपालिका-११ सिमलटारस्थित राप्ती खोलामा सोही उपमहानगरपालिका-११ थानाभर्‍याङ बस्ने ४५ वर्षीय कुमार भारती शनिबार मृत अवस्थामा फेला परेका छन् । त्यस्तै सिरहा, लहान नगरपालिका-२४ मनिक दह बस्ने ३५ वर्षीय शिव नारायण यादव सखुवानान्कारकट्टी गाउँपालिका-५ कल्यानपुरस्थित बलान खोलामा शनिबार मृत अवस्थामा फेला परेका छन् । सवै घटनाका सम्बन्धमा प्रहरीले आवश्यक अनुसन्धान गरिरहेको छ ।