देशका विभिन्न स्थानबाट मृत अवस्थामा ७ जना फेला परेका छन् । पाँचथर, कुम्मायक गाउँपालिका-४ याक्से टोलस्थित धन बहादुर नेपालीको घरमा पाहुना आएका सोही गाउँपालिका-५ थर्पु बस्ने धनकुटा घर बताउने ५५ वर्षीय रमेश रोक्का आफू सुतेको खाटमा शुक्रबार मृत अवस्थामा फेला परेका छन् ।

त्यस्तै गुल्मी, चन्द्रकोट गाउँपालिका-५ धुवाखर्क घर भई हाल सोही गाउँपालिका-४ शान्तिपुर श्रीलंका टोल डेरा गरी बस्ने धनमाया सार्कीकी छोरी १५ वर्षीया मनिसा रुचाल सोही गाउँपालिका-४ शान्तिपुरस्थित हुग्दी खोलामा मृत अवस्थामा फेला परेकी छन् ।

बिहीबार दिउँसो खेतमा धान उठाउने क्रममा सूर्ती लिन बजार गएकी उनको शुक्रबार शव फेला परेको हो । यता काठमाडौं, चन्द्रागिरी नगरपालिका-९ मच्छेगाउँ बस्ने ४२ वर्षीय रामशरण बस्नेत आफ्नै निमार्णाधिन घरमा शुक्रबार मृत अवस्थामा फेला परेका छन् ।

यस्तै धादिङ, बेनिघाट रोराङ गाउँपालिका-३ मलेखुस्थित त्रिशुली नदीको किनारमा सोही गाउँपालिका-३ सलाङघाट बस्ने ८३ वर्षीया गोमा देवी पाण्डे शुक्रबार मृत अवस्थामा फेला परेकी छिन् । उता काभ्रे, पाँचखाल नगरपालिका-२ डाँडाखेत बस्ने ३५ वर्षीय उद्धव प्रसाद चौलागाईं   सोही ठाउँस्थित कुलेसोमा शुक्रबार मृत अवस्थामा फेला परेका छन् ।

त्यसैगरी कञ्चनपुर, शुक्लाफाँटा नगरपालिका-१ गणेशपुर बस्ने ५५ वर्षीय प्रेम सिंह ऐर आफ्नै घरमा शुक्रबार मृत अवस्थामा फेला परेका छन् । यस्तै दाङ,  तुलसीपुर उपमहानगरपालिका-५ मासु मार्केट पछाडी हाल नाम, थर, वतन नखुलेका करिब ५३ वर्षीय पुरूष बिहीबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।