देशका छुट्टाछुट्टै स्थानमा भएको सवारी दुर्घटनामा सात जनाको मृत्यु भएको छ । काठमाडौं महानगरपालिका-१५ स्वयम्भू चमतीस्थित सडकमा प्रदेश ३ -०१-२३ च ०४७० नम्बरको गाडीले बाग्मती प्रदेश ०२-०४४प १७६८ नम्बरको मोटरसाइकललाई शुक्रबार बिहान ठक्कर दिँदा मोटरसाइकलमा सवार धादिङ ज्वालामुखी गाउँपालिका-२ घर भई हाल काठमाडौं बानियाँटार बस्ने २५ वर्षीय सुजन तामाङको मृत्यु भएको छ ।

ठक्करबाट गम्भीर घाइते भएका उनको क्षेत्रपाटी अस्पतालमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकल चालकको उपचारको लागि वीर अस्पताल पठाइएको छ । गाडी चालकलाई प्रहरीले नियन्त्रणमा लिएको छ । त्यस्तै रूपन्देही, बुटवल उपमहानगरपालिका-१३ जितगढीस्थित सडकमा लु.१ ख ५८६९ नम्बरको बस र लु.८१ प ८०६ नम्बरको मोटरसाइकल एकआपसमा ठक्कर खाई बिहीबार दिउँसो दुर्घटना हुँदा मोटरसाइकल चालक सोही उपमहानगरपालिका-१३ बस्ने ३८ वर्षीय नारायण सापकोटाको मृत्यु भएको छ ।

दुर्घटनामा गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो । बस चालकलाई प्रहरीले नियन्त्रणमा लिएको छ । यता रौतहट, चन्द्रपुर नगरपालिका-४ स्थित सडकमा मधेश प्रदेश ०४-००१ प ४१३० नम्बरको मोटरसाइकल अनियन्त्रित भई बिहीबार दिउँसो दुर्घटना हुँदा मोटरसाइकलमा सवार सर्लाही हरिवन नगरपालिका-३ बस्ने ६० वर्षीय चन्द्र बहादुर मोक्तानको मृत्यु भएको छ ।

दुर्घटनामा गम्भीर घाइते भएका उनको चन्द्रपुर अस्पताल चन्द्रनिगाहपुरमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकल चालकको सोही अस्पतालमा उपचार भइरहेको छ । यस्तै कपिलवस्तु, शुद्धोधन गाउँपालिका-२ मदारगढस्थित लु.४ त १५२४ नम्बरको ट्याक्टरले खेत जोत्ने क्रममा ट्याक्टरमा च्यापिएर सोही ठाउँ बस्ने ४२ वर्षीय मुस्ताफा मुसलवानको बिहीबार साँझ मृत्यु भएको छ । च्यापिएर गम्भीर घाइते भएका उनको मेडिकल कलेज भैरहवामा उपचारको क्रममा मृत्यु भएको हो । हाल फरार ट्याक्टर चालकको प्रहरीले खोजी गरिरहेको छ ।

यसैगरी लमजुङ, राइनास नगरपालिका-३ ज्यामिरेमा ग.१ त ७०१६ नम्बरको ट्याक्टरबाट खसेर सोही ठाउँ बस्ने २५ वर्षीय टेक बहादुर गुरुङको बिहीबार साँझ मृत्यु भएको छ । ट्याक्टरबाट खसेर गम्भीर घाइते भएका उनको पुरानो मेडिकल कलेज भरतपुर चितवनमा थप उपचारको क्रममा मृत्यु भएको हो । ट्याक्टर चालकलाई प्रहरीले नियन्त्रणमा लिएको छ ।

यस्तै बाँके, कोहलपुर नगरपालिका-१४ पिपिरस्थित सडकमा ना।६ ख ८८९८ नम्बरको मिनीट्रकको ठक्करबाट साइकलयात्री सोही नगरपालिका-१० चटार बस्ने ३५ वर्षीय तिर्थराम थारूको बिहीबार राति मृत्यु भएको छ । दुर्घटनामा गम्भीर घाइते भएका उनको मेडिकल कलेज कोहलपुरमा उपचारको क्रममा मृत्यु भएको हो । ट्रक चालकलाई प्रहरीले नियन्त्रणमा लिएको छ ।

उता झापा, बिर्तामोड नगरपालिका-२ चारपानेस्थित सडकमा प्र.१-०१-००१ ज ३७६० नम्बरको गाडीको ठक्करबाट पैदलयात्री सोही ठाउँ बस्ने ५५ वर्षीय गंगा प्रसाद राजवंशीको शुक्रबार बिहान घटनास्थलमै मृत्यु भएको छ । गाडी चालकलाई प्रहरीले नियन्त्रणमा लिएको छ । दुर्घटनाका सम्बन्धमा प्रहरीले थप अनुसन्धान गरिरहेको छ ।