देशका छुट्टाछुट्टै स्थानमा भएको सवारी दुर्घटनामा चार जनाको मृत्यु भएको छ । मकवानपुर, हेटौंडा उपमहानगरपालिका-१५ रातोमाटोस्थित सडकमा ना.४ ख ९५२० नम्बरको बसले ना.५३ प ८५२७ नम्बरको मोटरसाइकललाई शुक्रबार बिहान ठक्कर दिँदा मोटरसाइकलमा सवार बारा जितपुर सिमरा उपमहानगरपालिका-१२ बस्ने ३२ वर्षीया निशा कुमारीको मृत्यु भएको छ ।

दुर्घटनामा गम्भीर घाइते भएकी उनको हेटौंडा अस्पतालमा उपचारको क्रममा मृत्यु भएको हो । बस चालकलाई प्रहरीले नियन्त्रणमा लिएको छ । त्यस्तै चितवन, भरतपुर महानगरपालिका-२८ अन्द्रौलीमा बा.प्र-०६-०१प ३४७६ नम्बरको मोटरसाइकल अनियन्त्रित भई बिहीबार बेलुकी दुर्घटना हुँदा मोटरसाइकलमा सवार सोही ठाउँ बस्ने ४८ को रण वहादुर बानियाँको मृत्यु भएको छ ।

दुर्घटनामा गम्भीर घाइते भएका उनको भरतपुर सरकारी अस्पतालमा उपचारको क्रममा मृत्यु भएको हो ।दुर्घटनामा घाइते भएका मोटरसाइकल चालकको सोही अस्पतालमा उपचार भइरहेको छ । यसैगरी चितवन, भरतपुर महानगरपालिका-१८ गुन्जनगर टोलमा ना.५१ प ६४९२ नम्बरको मोटरसाइकलको ठक्करबाट पैदलयात्री हाल, नाम, थर वतन नखुलेकी अन्दाजी ३५ वर्षीया महिलाको शुक्रबार दिउँसो मृत्यु भएको छ ।

ठक्करबाट गम्भीर घाइते भएकी उनको पुरानो मेडिकल कलेज भरतपुरमा उपचारको क्रममा मृत्यु भएको हो । साथै घाइते भएका मोटरसाइकलमा सवार अन्य २ जनाको सोही अस्पतालमा उपचार भइरहेको छ । यता कञ्चनपुर, पुनर्वास नगरपालिका-२ माईली बजारमा म।२ प ४६२५ नम्बरको मोटरसाइकल सोही ठाउँमा रोकिराखेको से।१ त ४१५९ नम्बरको ट्याक्टरमा ठोक्किएर बिहीबार दुर्घटना हुँदा मोटरसाइकल चालक सोही नगरपालिका-५ उदरी बस्ने २१ वर्षीय अभिषेक रानाको मृत्यु भएको छ ।

दुर्घटनामा गम्भीर घाइते भएका उनको मेट्रो अस्पतालमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार २ जनाको सोही अस्पतालमा उपचार भइरहेको छ । ट्याक्टर चालकलाई प्रहरीले नियन्त्रणमा लिई यस सम्बन्धमा आवश्यक अनुसन्धान गरिरहेको छ । सबै घटनाको सम्बन्धमा प्रहरिल्ले अनुसन्धान गरिरहेको छ ।