देशका विभिन्न स्थानबाट मृत अवस्थामा १० जना फेला परेका छन् । दाङ, घोराही उपमहानगरपालिका-९ दुबिचौरस्थित पोखरीमा सोही उपमहानगरपालिका-९ दुबीचौर बस्ने ६० वर्षीया ठेक्या थरुनी आइतबार मृत अवस्थामा फेला परेकी छन् ।

त्यस्तै हुम्ला, ताजाकोट गाउँपालिका-३ चौतारीवाडा बस्ने २४ वर्षीय मोहन नेपाली सोही गाउँपालिका-४ स्थित खराभिर नजिक आइतबार मृत अवस्थामा फेला परेका छन् । यता भक्तपुर, सूर्यबिनायक नगरपालिका-५ श्रृजनानगर बस्ने ४३ वर्षीया माया देवी शाक्य आफ्नै सुत्ने कोठामा आइतबार मृत अवस्थामा फेला परेकी छन् ।

यसैगरी भक्तपुर, चाँगुनारायण नगरपालिका-८ सुडालस्थित टहरोमा डेरा गरी बस्ने सिन्धुपाल्चोक मेलम्ची पाचँपोखरी घर भएका ४५ वर्षीय सुकमान तामाङ सोही टहरोमा आइतबार मृत अवस्थामा फेला परेका छन् ।यस्तै रूपन्देही, बुटवल उपमहानगरपालिका-११ योगीकुटी बस्ने ३१ वर्षीया भक्त बहादुर बुढापृथी आफ्नै घरमा आइतबार मृत अवस्थामा फेला परेका छन् ।

उता बझाङ, केदारस्युँ गाउँपालिका-१ बिलै बस्ने २५ वर्षीय राम कुमार भण्डारी सोही ठाउँस्थित चौडाम बगरको भिरमा शनिबार मृत अवस्थामा फेला परेका छन् । खेतमा सिँचाई गर्न गएका उनी अवेरसम्म नफर्किएपछि खोजी गर्ने क्रममा उनको शव फेला परेको हो ।

यस्तै बारा, जितपुरसिमरा उपमहानगरपालिका-२२ पर्सा राष्ट्रिय निकुञ्ज नजिक भेराहा खोलाको छेउमा हाल नाम, थर, वतन नखुलेकी अन्दाजी ४५ वर्षीया महिला शनिबार मृत अवस्थामा फेला परेकी छिन् । उता कास्की, पोखरा महानगरपालिका-५ मालेपाटनस्थित कुलोमा सोही महानगरपालिका-५ पर्स्याङ बस्ने ५५ वर्षीय भिम बहादुर केसी शनिबार मृत अवस्थामा फेला परेका छन् ।

यसैगरी सोही महानगरपालिका-७ घारीपाटनस्थित सेती नदीको खोँचमा सडिगलेको अवस्थामा हाल पहिचान नखुलेको मानिसको शव फेला परेको छ । त्यसैगरी डोटी, जोरायल गाउँपालिका-१ धरमपुरस्थित खोल्सामा हाल नाम, थर, वतन नखुलेका अन्दाजी ३५ वर्षीय पुरुष शनिबार मृत अवस्थामा फेला परेका छन् ।

त्यस्तै रामेछाप, रामेछाप नगरपालिका-६ हुदिल बस्ने ६१ वर्षीय श्याम कुमार खड्का सोही ठाउँस्थित बोक्सेपानी भिर तल शनिबार मृत अवस्थामा फेला परेका छन् । सबै घटनाका सम्बन्धमा प्रहरीले आवश्यक अनुसन्धान गरिरहेको छ ।