देशका छुट्टाछुट्टै स्थानमा भएको सवारी दुर्घटनामा परी दुई जनाको मृत्यु भएको छ । कैलाली, गौरीगंगा नगरपालिका-३ कुचैनीमा से.३प १४१७ नम्बरको मोटरसाइकल अनियन्त्रित भई सोमबार दिउँसो दुर्घटना हुँदा चालक धनगढी उपमहानगरपालिका-१३ बस्ने ४५ वर्षीय कुते सार्कीको मृत्यु भएको छ ।

दुर्घटनामा गम्भीर घाइते भएका उनको सेती प्रादेशिक अस्पताल धनगढीमा उपचारको क्रममा मृत्यु भएको हो । मोटरसाइकलमा सवार अर्का घाइते एक जनाको सोही अस्पतालमा उपचार भइरहेको छ । त्यस्तै दाङ, घोराही उपमहानगरपलिका-३ मसोटमा रा.१ ख २८४० नम्बरको टिपरलाई रा.७ प ३३३१ नम्बरको मोटरसाइकलले ओभरटेक गर्ने क्रममा एक-आपसमा ठक्कर खाई मंगलबार दिउँसो दुर्घटना हुँदा मोटरसाइकलमा सवार लमही नगरपालिका-४ बस्ने ६३ वर्षीया दिपा बुढाथोकीको मृत्यु भएको छ ।

दुर्घटनामा गम्भीर घाइते भएकी उनको राप्ती स्वास्थ्य बिज्ञान प्रतिष्ठान घोराहीमा उपचारको क्रममा मृत्यु भएको हो । हाल फरार टिपर चालकको प्रहरीले खोजी गरिरहेको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।