देशका विभिन्न स्थानबाट मृत अवस्थामा ६ जना फेला परेका छन् । काठमाडौं महानगपालिका-३२ कोटेश्‍वर खरिबोट डेरा गरी बस्ने दोलखा बिगु गाउँपालिकाका ६० वर्षीय कुमार बहादुर खड्का आफ्नै कोठामा आइतबार मृत अवस्थामा फेला परेका छन् ।

यसैगरी काठमाडौं थापाथली चोकमा हाल नाम, थर, वतन नखुलेका अन्दाजी ४० वर्षीय पुरुष, बुढानिलकण्ठ नगरपालिका-४ भसन्थली लिपिकोटस्थित नालामा ४३ वर्षीय रमेश कार्की नाम गरेका व्यक्ति र काठमाडौं कलंकीस्थित बज्रबाराही ढुवानी सेवा डिपोमा अन्दाजी ७ महिनाको सालनालसहितको नवजात शिशु आइतबार मृत अवस्थामा फेला परेका छन् ।

त्यस्तै रूपन्देही, सैनामैना नगरपालिका-२ सोरौली संगम चोकस्थित बाटोको छेउमा सोही नगरपालिका-४ झारबैरा बस्ने ७० वर्षीय जोखु थारु आइतबार मृत अवस्थामा फेला परेका छन् । यता सर्लाही, कबिलासी नगरपालिका-६ जमुनिया बस्ने ७५ वर्षीया राजकली देवी ठाकुर सोही ठाउँस्थित महादेवस्थान बिर्ता पोखरीमा आइतबार मृत अवस्थामा फेला परेकी छन् ।

यस्तै सुनसरी, देवानगंज गाउँपालिका-५ साहेबगंज सुडिटोल बस्ने ३० वर्षीय रविन साह सोही ठाउँस्थित मरिया खोलाको छेउमा शनिबार मृत अवस्थामा फेला परेका छन् । उता बाजुरा, बडिमालिका नगरपालिका-८ रतुडा बस्ने ५३ वर्षीय ताराचन्द्र ऐडी सोही ठाउँस्थित भिरमा शनिबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।