बाँकेको नेपालगञ्जमा कारको ठक्करबाट दुईजनाको मृत्यु भएको छ भने एकजना गम्भीर घाइते भएका छन् । आइतबार राति नेपालगञ्जबाट कोहलपुरतर्फ जाँदै गरेको सुदूरपश्चिम प्रदेश ०१००१च ३४६३ नं को कारले नेपालगञ्ज उपमहानगरपालिका–१८ कारकाँदोस्थित एसके पेट्रोलपम्प नजिकै ठक्कर दिँदा दुई जनाको मृत्यु भएको हो ।

मृत्यु हुनेमा नेपालगञ्ज–१३ का २४ वर्षीया आस्था शाहको रहेको र अर्का मृतक पुरुषको भने पहिचान खुल्न बाँकी छ । मृतक दुबैको उपचारको लागि अस्पताल लैजाँदै गर्दा मृत्यु भएको हो ।

त्यस्तै दुर्घटनामा परी नेपालगञ्ज–१३ की सहाना शाह घाइते भएकी छिन् । उनको नेपालगञ्ज मेडिकल कलेजमा उपचार भइरहेको छ । प्रहरीले दुर्घटनाको विषयमा थप अनुसन्धान गरिरहेको छ ।