देशका छुट्टाछुट्टै स्थानमा भएको सवारी दुर्घटनामा चार जनाको मृत्यु भएको छ । पर्सा, वीरगंज महानगरपालिका-२९ मुसैली टोलस्थित सडकमा ना.५ त ८९३६ नम्बरको ट्याक्टरको ठक्करबाट साइकलयात्री सोही ठाउँ बस्ने १६ वर्षीय रुपेश महतो मण्डलको बुधबार दिउँसो मृत्यु भएको छ ।

दुर्घटनामा गम्भीर घाइते भएका उनको एलएस न्युरो अस्पताल बारामा उपचारको क्रममा मृत्यु भएको हो । हाल फरार ट्याक्टर चालकको प्रहरीले खोजी गरिरहेको छ । त्यस्तै बर्दिया, मधुवन नगरपालिका-२ खैरेनीस्थित सडकमा साइकलबाट लडेर साइकलयात्री सोही नगरपालिका-३ खाता बस्ने ४५ वर्षीय लोहारी थारूको बुधबार बेलुकी मृत्यु भएको छ ।

साइकलबाट लडेर गम्भीर घाइते भएका उनको उपचारको लागि बर्दिया अस्पताल गुलरियातर्फ लैजाने क्रममा बाटोमै मृत्यु भएको हो । यस्तै रूपन्देही, सिद्धार्थनगर नगरपालिका-१० शंकरपुरस्थित सडकमा हाल नम्बर नखुलेको सवारी साधनको ठक्करबाट साइकलयात्री सोही नगरपालिका-४ सिद्धिविनायक खाद्य उद्योगमा काम गरी बस्ने भारत घर भएका ५५ वर्षीय चन्द्रदेव तिवारीको बुधबार बेलुकी मृत्यु भएको छ ।

ठक्करबाट गम्भीर घाइते भएका उनको भिम अस्पताल भैरहवामा उपचारको क्रममा मृत्यु भएको हो । हाल फरार सवारी साधन र चालकको प्रहरीले खोजी गरिरहेको छ । उता सुनसरी, इटहरी उपमहानगरपालिका-२० शान्तीचोकमा मे.१० प ४९२९ नम्बरको स्कुटर अनियन्त्रित भई गएराति दुर्घटना हुँदा चालक सोही उपमहानगरपालिका-२० बस्ने ३८ वर्षीय तेन्जिङ तिताङको मृत्यु भएको छ ।

दुर्घटनामा गम्भीर घाइते भएका उनको घोपा अस्पताल धरानमा उपचारको क्रममा मृत्यु भएको हो । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।