देशका विभिन्न स्थानबाट मृत अवस्थामा ९ जना फेला परेका छन् । नवलपरासी पूर्व, गैंडकोट नगरपालिका-१२ शिख्रौलीघाट नारायणी नदीमा सोही नगरपालिका हर्कपुर बस्ने ६५ वर्षीय नेत्र बहादुर बिक आइतबार मृत अवस्थामा फेला परेका छन् ।

त्यस्तै सुनसरी, इटहरी उपमहानगरपालिका-१ स्थित कल्भर्टमा गढी गाउँपालिका-६ बस्ने ४२ वर्षीय चित नारायण माझी गएराति मृत अवस्थामा फेला परेका छन् । यस्तै कालीकोट, शुभकालिका गाउँपालिका-२ भर्तागार्ड खोलाको भुनछहरा दहमा हाल नाम, थर, वतन नखुलेका अन्दाजी ३५ वर्षीय पुरूष आइतबार मृत अवस्थामा फेला परेका छन् ।

उता चितवन, भरतपुर महानगरपालिका-३ न्युरोडस्थित सडकको छेउमा हाल नाम, थर, वतन नखुलेको अन्दाजी ४५ वर्षीय पुरुष आइतबार मृत अवस्थामा फेला परेका छन् । त्यस्तै कञ्चनपुर, भिमदत्त नगरपालिका-९ वडा कार्यालय नजिक हाल एकिन नाम, थर, वतन नखुलेका शंकर भनेर बोलाउने गरिएका करिब ४० वर्षीय भारतीय नागरीक शनिबार मृत अवस्थामा फेला परेका छन् ।

यता खोटाङ, रुपाकोट मझुवागढी नगरपालिका-२ सोल्मा बस्ने ५० वर्षीय ध्यान बहादुर राई सोही ठाउँ बस्ने जितेन्द्र राईको मतान घरमा शनिबार मृत अवस्थामा फेला परेका छन् । यसैगरी रूपन्देही, सिद्धार्थनगर नगरपालिका-९ संगमपथ बस्ने ७५ वर्षीय प्रेमराज आचार्य सोही ठाउँस्थित नालामा शनिबार मृत अवस्थामा फेला परेका छन् ।

त्यसैगरी उदयपुर, उदयपुरगढी गाउँपालिका-७ दमाइकुटे कुईभिर खोलामा सोही गाउँपालिका- ७ ससुराली गाँउमा बस्दै आएका रौतामाई गाउँपालिका-८ घर भएका ३८ वर्षीय जमान सिंह लाय मगर शनिबार मृत अवस्थामा फेला परेका छन् । यस्तै इलाम, माइ नगरपालिका-२ झ्याम्टेस्थित भिरमा बर्दिया मधुवन नगरपालिका-९ घर भई झापा दोमुखास्थित सिँचाइको ड्याम बनाउने काम गर्दै आएका २१ वर्षीय समिर थारु शनिबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।