मकवानपुर, हेटौंडा उपमहानगरपालिका-१५ रातोमाटेबाट स्रोत नखुलेको ५ लाख ४९ हजार १ सय भारतीय रूपैयाँ र २ लाख ५० हजार नेपाली रूपैयाँसहित ४ जनालाई गएराति प्रहरीले पक्राउ गरेको छ ।

पक्राउ पर्नेहरूमा भारत बिहार राज्य सितामणी थाना-९ भुभैरवो बस्ने ३० वर्षीय राकेश कुमार, ३० वर्षीय चन्द्र बाबु, ३७ वर्षीय अशोक राय र सुनसरी कोशी गाउँपालिका-४ बस्ने ३२ वर्षीय निजाम मिया रहेका छन् ।

प्रहरी चौकी रातोमाटेबाट खटिएको प्रहरीले वीरगंजबाट नारायणघाटतर्फ जाँदै गरेको बिआर ०१ एआर २९९१ नम्बरको भारतीय नम्बर प्लेटको कारलाई जाँच गर्ने क्रममा कारको सिट मुनी लुकाई छिपाई ल्याएको विभिन्न दरका उक्त नगद फेला पारी कारमा सवार उनीहरूलाई पक्राउ गरेको हो । यस सम्बन्धमा प्रहरीले थप अनुसन्धान गरिरहेको छ ।