देशका छुट्टाछुट्टै स्थानमा भएको सवारी दुर्घटनामा तीन जनाको मृत्यु भएको छ । रौतहट, गुजरा नगरपालिका-३ पशुपति टोलमा ना.७ त७५७ नम्बरको ट्याक्टरको ठक्करबाट साइकलयात्री सोही नगरपालिका-४ कनकपुर बस्ने १५ वर्षीय साह नेवाजको आइतबार बिहान मृत्यु भएको छ ।

ठक्करबाट गम्भीर घाइते भएका उनको जननायक अस्पताल कोल्हवी बारामा उपचारको क्रममा मृत्यु भएको हो । ट्याक्टर चालकलाई प्रहरीले नियन्त्रणमा लिएको छ । त्यस्तै सिरहा, सिरहा नगरपालिका-९ गुलरिया चौकमा हाल नम्बर नखुलेको ‘अन टेस्ट’ लेखिएको मोटरसाइकल अनियन्त्रित भई आइतबार दिउँसो दुर्घटना हुँदा चालक सोही नगरपालिका-९ ठेङ्गी बस्ने ४० वर्षीय डम्बर कुमार यादवको मृत्यु भएको छ ।

दुर्घटनमा घाइते भएका उनको उपचारको लागि प्रादेशिक अस्पताल सिरहातर्फ लैजाने क्रममा मृत्यु भएको हो । यस्तै सिन्धुली, तिनपाटन गाउँपालिका-३ जोगेस्थित सडकमा प्रदेश २ -०२-००३ प ३४८८ नम्बरको मोटरसाइकल अनियन्त्रित भई बा.प्र ०१-००६ ख ४६१४ नम्बरको बसमा ठक्कर खाई शनिबार दिउँसो दुर्घटना हुँदा मोटरसाइकल चालक रौतहट परोहा नगरपालिका-५ भिडियाहे बस्ने ३० वर्षीय दिपेन्द्र प्रसाद पटेलको मृत्यु भएको छ ।

दुर्घटनामा गम्भीर घाइते भएका उनको उपचारको लागि जिल्ला अस्पताल सिन्धुलीतर्फ लैजाने क्रममा मृत्यु भएको हो । बस चालकलाई प्रहरीले नियन्त्रणमा लिई दुर्घटनाका सम्बन्धमा आवश्यक अनुसन्धान गरिरहेको छ ।