देशका विभिन्न स्थानमा भएको सवारी दुर्घटनामा चार जनाको मृत्यु भएको छ । सुर्खेत, वीरेन्द्रनगर नगरपालिका-७ गौजेनी भन्ने स्थानमा दैलेखको भुकाबाट सुर्खेततर्फ जाँदै गरेको कर्णाली प्रदेश ०२००१ ख ०८५२ नम्बरको मिनी बस सोमबार दिउँसो दुर्घटना हुँदा बसमा सवार हाल नाम, थर, वतन नखुलेका २ जना पुरूषको घटनास्थलमै मृत्यु भएको छ ।
साथै दुर्घटनामा घाइते भएका बसमा सवार अन्य १८ जनालाई उपचारको लागि कर्णाली प्रादेशिक अस्पताल कालागाउँ र कर्णाली केयर अस्पताल सुर्खेततर्फ पठाइएको छ । त्यस्तै बारा, परवानीपुर गाउँपालिका-४ चैनपुर चोकमा सिमराबाट वीरगंजतर्फ जाँदै गरेको हाल नम्बर नखुलेको सवारी साधनको ठक्करबाट हाल नाम, थर, वतन नखुलेका अन्दाजी २६ वर्षीय पुरूषको सोमबार बिहान मृत्यु भएको छ ।
ठक्करबाट गम्भीर घाइते भएका उनको नारायणी अस्पताल वीरगंजमा उपचारको क्रममा मृत्यु भएको हो । ठक्कर दिने सवारी साधनको प्रहरीले खोजी गरिरहेको छ । यस्तै मुस्ताङ, बारागुङ मुक्तिक्षेत्र गाउँपालिका-३ तेताङस्थित सडकमा ग.१ त ४८०४ नम्बरको ट्याक्टर सोमबार दिउँसो दुर्घटना हुँदा चालक सोही ठाउँ बस्ने म्याग्दी धौलागिरी गाउँपालिका-४ बुडी घर भएका २० वर्षीय सन्तोष बिकको मृत्यु भएको छ ।
दुर्घटनामा गम्भीर घाइते भएका उनको जिल्ला अस्पताल जोमसोममा उपचारको क्रममा मृत्यु भएको हो । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
