देशका विभिन्न स्थानमा भएको सवारी दुर्घटनामा सात जनाको मृत्यु भएको छ । महोत्तरी, सम्सी गाउँपालिका-४ भेटपुरस्थित सडकमा सम्सीबाट जलेश्वरतर्फ जाँदै गरेको हाल नम्बर नखुलेको मोटरसाइकलको ठक्करबाट पैदलयात्री सोही ठाउँ बस्ने ७५ वर्षीय राम आशिस पण्डितको शनिबार बेलुकी मृत्यु भएको छ ।

ठक्करबाट गम्भीर घाइते भएका उनको काव्या अस्पताल जनकपुरमा उपचारको क्रममा मृत्यु भएको हो । हाल फरार मोटरसाइकल चालकको प्रहरीले खोजी गरिरहेको छ । त्यस्तै पाँचथर, हिलिहाङ गाउँपालिका-१ भालुचोक बजारस्थित सडकमा फिदिमबाट ताप्लेजुङतर्फ जाँदै गरेको ना.१ क ४५३३ नम्बरको टिपरको ठक्करबाट पैदलयात्री पाँचथर हिलिहाङ गाउँपालिका-१ बस्ने ७२ वर्षीय रुपध्वज राईको आइतबार बिहान मृत्यु भएको छ ।

ठक्करबाट गम्भीर घाइते भएका उनको जिल्ला अस्पताल पाँचथर हुँदै फिक्कल सरकारी अस्पताल इलाममा उपचारको क्रममा मृत्यु भएको हो । टिपर चालकलाई प्रहरीले नियन्त्रणमा लिएको छ । यस्तै सुनसरी, बराहक्षेत्र नगरपालिका-२ करमखोला पुलस्थित सडकमा तेर्हआदीबाट चतरातर्फ जाँदै गरेको को.२८ प ४७५८ नम्बरको मोटरसाइकल शनिबार दिउँसो दुर्घटना हुँदा मोटरसाइकलमा सवार सोही नगरपालिका-२ सखुवागाछी बस्ने ३५ वर्षीय पुष्प बस्नेतको छोरा ७ वर्षीय अनुभब बस्नेतको मृत्यु भएको छ ।

दुर्घटनामा गम्भीर घाइते भएका उनको विपी कोइराला स्वास्थ्य विज्ञान प्रतिष्ठान घोपा धरानमा उपचारको क्रममा मृत्यु भएको छ । साथै दुर्घटनामा घाइते भएका मोटरसाइकल चालक पुष्प बस्नेतको सोही अस्पतालमा उपचार भइरहेको छ । उता सर्लाही, बसबरिया गाउँपालिका-१ मानपुस्थित सडकमा प्र.२-०२-००१ त २२८० नम्बरको ट्याक्टरले किचेर धनकौल गाउँपालिका-३ हरकठवा बस्ने ३० वर्षीय सुरेश कुमार सिंहको शनिबार साँझ मृत्यु भएको छ ।

सोही सडकमा म.प्र ०३-०३०प ९८५८ नम्बरको मोटरसाइकल र हाल अल्फाबेट नखुलेको १६४३ नम्बरको मोटरसाइकल एकआपसमा ठक्कर खाई दुर्घटना भएपश्चात मानपुर बजारबाट मानपुर व्यारेजतर्फ जाँदै गरेको उक्त ट्याक्टरले म.प्र ०३-०३०प ९८५८ नम्बरको मोटरसाइकल चालक सिंहलाई किच्दा उनको घटनास्थलमै मृत्यु भएको हो । ट्याक्टर चालकलाई प्रहरीले नियन्त्रणमा लिएको छ । हाल फरार मोटरसाइकल चालकको प्रहरीले खोजी गरिरहेको छ ।

यता मकवानपुर, हेटौंडा उपमहानगरपालिका-३ तिनताप्केस्थित सडकमा नेवारपानीबाट लेवटतर्फ जाँदै गरेको ना.१ ज ७५६० नम्बरको म्याजिक गाडीको ठक्करबाट पैदलयात्री सोही उपमहानगपालिका-१२ बनस्पति बस्ने ५५ वर्षीय श्याम बहादुर विकको शनिबार राति मृत्यु भएको छ । दुर्घटनामा गम्भीर घाइते भएको उनको हेटौंडा अस्पतालमा उपचारको क्रममा मृत्यु भएको हो । गाडी चालकलाई प्रहरीले नियन्त्रणमा लिएको छ ।

यसैगरी मकवानपुर, मनहरी गाउँपालिका-६ नयाँ बजारस्थित सडकमा ना.५ ख ७७२१ नम्बरको ट्रकले बा.प्र.-०३-००४ प ६९७३ नम्बरको मोटरसाइकललाई शनिबार साँझ ठक्कर दिँदा मोटरसाइकल चालक हेटौंडा उपमहानगरपालिका-८ कमाने बस्ने ४५ वर्षीय दिनेश कार्कीको मृत्यु भएको छ । ठक्करबाट गम्भीर घाइते भएका उनको नयाँ मेडिकल कलेज भरतपुर चितवनमा उपचारको क्रममा मृत्यु भएको हो ।

ट्रक चालकलाई प्रहरीले नियन्त्रणमा लिएको छ । त्यसैगरी उदयपुर, उदयपुरगढी गाउँपालिका-६ दनुवार बेसीस्थित सडकमा हाल नम्बर नखुलेको सवारी साधनको ठक्करबाट हाल नाम, थर, वतन नखुलेकी करिब ३५ वर्षीया महिलाको शनिबार राति मृत्यु भएको छ ।

ठक्करबाट गम्भीर घाइते भएको अवस्थामा फेला परेकी उनको जिल्ला अस्पताल उदयपुरमा उपचारको क्रममा मृत्यु भएको हो । हाल फरार सवारी साधन र चालकको प्रहरीले खोजी गरिरहेको छ । दुर्घटनाका सम्बन्धमा प्रहरीले थप अनुसन्धान गरिरहेको छ ।