मृत अवस्थामा देशका विभिन्न स्थानबाट छ जना फेला परेका छन् । बाँके, राप्तिसोनारी गाउँपालिका-२ हर्दवास्थित राप्ती नदीको बीच भागमा सोही गाउँपालिका-२ माथेबास बस्ने ७५ वर्षीय दल बहादुर खत्री बुधबार मृत अवस्थामा फेला परेका छन् ।

त्यस्तै काठमाडौं, नागार्जुन नगरपालिका-३ ठुलोभर्‍याङ चोक नजिकै बाटोमा हाल नाम, थर, वतन नखुलेकी अन्दाजी ५५ वर्षीया महिला बुधबार मृत अवस्थामा फेला परेकी छिन् । यसैगरी काठमाडौं महानगरपालिका-२२ संकटा मन्दिर परिसरभित्र रहेको राजकृति महाविहार मन्दिरको ढोका अगाडि दोलखा मेलुङ गाउँपालिका-६ घर भएका ६१ वर्षीय डम्बर बहादुर नेपाली मंगलबार मृत अवस्थामा फेला परेका छन् ।

यस्तै दाङ, गढवा गाउँपालिका-५ ठुलिचौर बस्ने ५५ वर्षीय चन्द्रवान नेपाली सोही ठाउँस्थित सालघारी वनको खोल्सामा बुधबार मृत अवस्थामा फेला परेका छन् । मंगलबार लहरा काट्न भनी गएका उनी घर नफर्किएपछि खोजी गर्ने क्रममा शव फेला परेको हो । उता पर्सा, जगरनाथपुर गाउँपालिका-१ बिशुनपुर्वा टोलस्थित ओरिया खोलाको किनारमा हाल नाम, थर, वतन नखुलेका अन्दाजी ५५ वर्षीय र ६० वर्षीय २ जना पुरूषको शव बालुवामा पुरिएको अवस्थामा मंगलबार फेला परेको छ ।

यता सिरहा, कल्याणपुर नगरपालिका-९ डुमरीस्थित रामजानकी मन्दिरको धर्मशालाको प्राङ्गणमा सोही नगरपालिका-२ चत्तरी बस्ने ४२ वर्षीय धनिकलाल खत्वे मण्डल मंगलबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।