देशका विभिन्न स्थानमा भएको सवारी दुर्घटनामा तीन जनाको मृत्यु भएको छ । बाँके, कोहलपुर नगरपालिका-३ हनुमान मन्दिरस्थित सडकमा भे.९ प २३३३ नम्बरको मोटरसाइकल भे.१ त ३६९३ नम्बरको ट्रयाक्टरमा ठक्कर खाई मंगलबार बिहान दुर्घटना हुँदा मोटरसाइकल चालक सुर्खेत गुर्बाकोट नगरपालिका-९ घर भई बाँके नेपालगंज उपमहानगरपालिका-१५ जमुनिया डेरा गरी बस्ने ४५ वर्षीय बल बहादुर वलीको मृत्यु भएको छ ।

दुर्घटनामा गम्भीर घाइते भएका उनको मेडिकल कलेज कोहलपुरमा उपचारको क्रममा मृत्यु भएको हो । प्रहरीले ट्रयाक्टर चालकलाई नियन्त्रणमा लिई दुर्घटनाका सम्बन्धमा आवश्यक अनुसन्धान गरिरहेको छ । त्यस्तै चितवन, भरतपुर महानगरपालिका-४ त्रिचोक स्थित सडकमा ना.५४ प ५८११ नम्बरको मोटरसाइकल अनियन्त्रित भई सोमबार दिउँसो दुर्घटना हुँदा चालक भरतपुर महानगरपालिका-७ नारायणपुर चोक बस्ने ३५ वर्षीय मनोज तामाङको मृत्यु भएको छ ।

दुर्घटनामा गम्भीर घाइते भएका उनको नयाँ मेडिकल कलेजमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार एक जनाको भरतपुर सरकारी अस्पतालमा उपचार भइरहेको छ । यस्तै भक्तपुर, सूर्यबिनायक नगरपालिका-७ गुण्डु तीनधारे स्थित सडकमा बा.प्र.०२-०२२ प १७४८ नम्बरको स्कुटर र बा.प्र.०२-०१७ प ५०१२ नम्बरको स्कुटर एकआपसमा ठक्करnखाई मंगलबार बिहान दुर्घटना हुदाँ बा.प्र.०२-०२२ प १७४८ नम्बरको स्कुटर चालक सूर्यबिनायक नगरपालिका-५ कटुन्जे थापागाउँ बस्ने २२ वर्षीया राजाराम थापामगरको मृत्यु भएको छ ।

दुर्घटनामा गम्भीर घाइते भएका उनको भक्तपुर अस्पतालमा उपचारको क्रममा मृत्यु भएको हो । साथै दुर्घटनामा घाइते भएकी बा.प्र.०२-०१७ प ५०१२ नम्बरको स्कुटर चालकको सोही अस्पतालमा उपचार भइरहेको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।