देशका विभिन्न स्थानबाट मृत अवस्थामा १२ जना फेला परेका छन् । बाँके, नेपालगंज उपमहानगरपालिका-१२ बेलासपुर बस्ने ३० वर्षीय पवन चिडिमार आफ्नो घर नजिकै रहेको खेतको पानीको नालामा मंगलबार मृत अवस्थामा फेला परेका छन् ।

त्यस्तै कास्की, पोखरा महानगरपालिका-३१ रातकुडा स्थित बेगनास तालमा हाल नाम, थर, वतन नखुलेका अन्दाजी ३५ वर्षीय पुरूष मंगलबार मृत अवस्थामा फेला परेका छ्न् । यस्तै कञ्चनपुर, दोधारा चाँदनी नगरपालिका-१० भुमिराज टोल स्थित खेतमा हाल नाम, थर, वतन नखुलेकी अन्दाजी २५ वर्षीया महिला मंगलबार मृत अवस्थामा फेला परेकी छिन् ।

उता नवलपरासी पूर्व, गैंडाकोट नगरपालिका-१ मजुवा सामुदायिक वन स्थित नारायणी नदी किनारमा हाल नाम, थर, वतन नखुलेका अन्दाजी ६० वर्षीय र ४५ वर्षीय २ जना पुरूष र अन्दाजी ३५ वर्षीया महिला गरी ३ जना मंगलबार मृत अवस्थामा फेला परेका छन् । यता अछाम, साँफेबगर नगरपालिका-७ मेलसेन स्थित बुढीगंगा नदीको किनारमा हाल नाम, थर, वतन नखुलेकी अन्दाजी ३५ वर्षीया महिला मंगलबार मृत अवस्थामा फेला परेकी छिन् ।

यसैगरी दाङ, गढवा गाउँपालिका-५ धर्मपुर बस्ने ६० वर्षीय देवनारायण चौधरी सोही गाउँपालिका-६ स्थित जनता माविको ग्राउण्डमा सोमबार मृत अवस्थामा फेला परेका छन् । त्यस्तै नवलपरासी पश्‍चिम, सुनवल नगरपालिका-४ चारघरे स्थित कच्ची बाटोको छेउमा सोही ठाउँ बस्ने ५८ वर्षीय बोधनाथ धिताल सोमबार मृत अवस्थामा फेला परेका छन् । त्यसैगरी पाल्पा, माथागढी गाउँपालिका-५ गणबास बस्ने २८ वर्षीया खुमीसरा बाह्रघरे सोही ठाउँ स्थित झुम्सा खोलामा सोमबार मृत अवस्थामा फेला परेकी छिन् ।

उता रोल्पा, रून्टिगढी गाउँपालिका-४ स्थित चेन खोलामा सोही गाउँपालिका-१ लापाल बस्ने हस्त बहादुर घर्ती मगरकी छोरी ५ वर्षीया प्रशंसा घर्ती मगर सोमबार मृत अवस्थामा फेला परेकी छिन् । यस्तै कास्की, पोखरा महानगरपालिका-३१ लामागाँउ स्थित बेगनास खोलाको छेउमा सोही महानगरपालिका-३१ चिप्ले बस्ने ४२ वर्षीय राम बहादुर नेपाली सोमबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।