देशका विभिन्न स्थानबाट मृत अवस्थामा सात जना फेला परेका छन् । कास्की, पोखरा महानगरपालिका-१६ कालिखोला बस्ने ७२ वर्षीय सार्की तामाङ सोही ठाउँ स्थित कालिखोलाको बगरमा शनिबार मृत अवस्थामा फेला परेका छन् ।

त्यस्तै भोजपुर, टेम्केमैयुम गाउँपालिका-९ छिकुवा बस्ने ४६ वर्षीया लिला राई आफ्नै घरमा शनिबार मृत अवस्थामा फेला परेकी छिन् । यस्तै चितवन, भरतपुर महानगरपालिका-२८ गोलाघाट स्थित नारायणी नदीको किनारमा भारत बिहार सितामणी बर्गेनिया जमुनिया बस्ने २८ वर्षीय ऋषि पल साह शनिबार मृत अवस्थामा फेला परेका छन् ।

उता कपिलवस्तु, महाराजगंज नगरपालिका-३ जमुनी स्थित सडक छेउको नालीमा बुद्धभुमि नगरपालिका-१० धनकौली बस्ने ४२ वर्षीय प्रभु रैदास (चमार) शनिबार मृत अवस्थामा फेला परेका छन् । यता नुवाकोट, लिखु गाउँपालिका-५ पहरेखेत स्थित लिखु खोलामा हाल नाम, थर, वतन नखुलेका अन्दाजी ६५ वर्षीय पुरूष शनिबार मृत अवस्थामा फेला परेका छन् ।

यस्तै उदयपुर, चौदण्डीगढी नगरपालिका-५ सिवाई स्थित त्रियुगा खोलाको बीचमा हाल नाम, थर, वतन नखुलेकी अन्दाजी ४५ वर्षीया महिला शनिबार मृत अवस्थामा फेला परेकी छिन् । यसैगरी धादिङ, बेनिघाट रोराङ गाउँपालिका-३ शितलबजार स्थित त्रिशुली नदीमा हाल नाम, थर, वतन नखुलेका अन्दाजी ५२ वर्षीय पुरूष शनिबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।