देशका विभिन्न स्थानबाट मृत अवस्थामा नौ जना फेला परेका छन् । ललितपुर, गोदावरी नगरपालिका-६ टिकाभैरव फैडोलस्थित अर्जुन महतको गोठमा सिन्धुपाल्चोक चौतारा साँगाचोकगढी नगरपालिका-९ घर बताउने ५० वर्षीय राज कुमार गिरी बुधबार मृत अवस्थामा फेला परेका छन् ।

त्यस्तै सुनसरी, इटहरी उपमहानगरपालिका-१२ खनार हटिया लाईन बस्ने ३८ वर्षीय कुमार राई सोही ठाउँ बस्ने झगरू चौधरीको घर अगाडि रहेको बरण्डाको खाटमा मंगलबार मृत अवस्थामा फेला परेका छन् ।

यसैगरी सुनसरी, रामधुनी नगरपालिका-५ बस्ने मिना मण्डलको घरमा उनकै भान्जा नाता पर्ने भारत अररिया बेलाही-१० बस्ने ६० वर्षीय भुटली राम बुधबार मृत अवस्थामा फेला परेका छन् । यस्तै दाङ, घोराही उपमहानगरपालिका-१७ कर्जाहीस्थित कल्भट मुनि पानीमा सोही ठाउँ बस्ने ३२ वर्षीया रीता चौधरी बुधबार मृत अवस्थामा फेला परेकी छिन् ।

यता नवलपरासी पूर्व, बिनयी त्रिवेणी गाउँपालिका-७ स्थित नेपाल भारत सिमानामा रहेको ब्यारेजपुलमा हाल नाम, थर, वतन नखुलेका अन्दाजी ४५ वर्षीय पुरूष बुधबार मृत अवस्थामा फेला परेका छन् । उता सप्तरी, कंचनरूप नगरपालिका-८ बिष्णु मन्दिर नजिक बाटोको छेउमा हाल नाम, थर, वतन नखुलेका पुरूष बुधबार मृत अवस्थामा फेला परेका छन् ।

त्यसैगरी नवलपरासी पूर्व, मध्यबिन्दु नगरपालिका-१२ तमासपुरस्थित नारायणी नदी किनारमा हाल नाम, थर, वतन नखुलेकी करिब ४० वर्षीया महिला र गैंडाकोट नगरपालिका-१० खरखरेस्थित नारायणी नदीको किनारमा हाल नाम, थर, वतन नखुलेका करिब ४२ वर्षीय पुरुष मंगलबार मृत अवस्थामा फेला परेका छन् ।

यस्तै अछाम, साँफेबगर नगरपालिका-१४ नरिसरा ठुलो ढुङ्गास्थित खप्तड राष्ट्रिय निकुञ्जको जंगलमा हाल नाम, थर, वतन नखुलेका करिब ५० वर्षीय पुरुष मंगलबार मृत अवस्थामा फेला परेका छन् । त्यस्तै कैलाली, गोदावरी नगरपालिका-२ बसपार्क रिङरोड जाने बाटो नजिकै डडेल्धुरा अमरगढी नगरपालिका-७ बस्ने ५२ वर्षीय दत्त राज भट्टराई मंगलबार मृत अवस्थामा फेला परेका छन् । यस सम्बन्धमा प्रहरीले आवश्यक अनुसन्धान गरिरहेको छ ।