देशका विभिन्न स्थानमा भएको सवारी दुर्घटनामा चार जनाको मृत्यु भएको छ । सिन्धुली, गोलन्जोर गाउँपालिका-३ बन्दिजोर खोलास्थित सडकमा देउरालीटारबाट सिन्धुलीतर्फ जाँदै गरेको प्रदेश २-००१ ह १३७१ नम्बरको अटो शुक्रबार दिउँसो दुर्घटना हुँदा अटोमा सवार कमलामाई नगरपालिका-१३ बस्ने ३५ वर्षीया मन्दिरा पौडेलको घटनास्थलमै मृत्यु भएको छ ।

अटोले पैदलयात्रीलाई ठक्कर दिई अनियन्त्रित भई दुर्घटना भएको थियो । दुर्घटनामा घाइते भएका अटोमा सवार अन्य ६ जना र पैदलयात्री १ जनाको सुनकोशी सामुदायिक अस्पतालमा उपचार भइरहेको छ । अटो चालकलाई प्रहरीले नियन्त्रणमा लिएको छ ।

त्यस्तै बाँके, नेपालगंज उपमहानगरपालिका-१ सिद्धार्थ कटेजस्थित सडकमा भे.१२ प ५०६० नम्बरको मोटरसाइकल र भे.१३ प ४५८१ नम्बरको मोटरसाइकल एक आपसमा ठक्कर खाई शुक्रबार साँझ दुर्घटना हुँदा भे.१३ प ४५८१ नम्बरको मोटरसाइकल चालक बाँके खजुरा गाउँपालिका-४ बस्ने २५ वर्षीय अर्जुन रोका क्षेत्रीको मृत्यु भएको छ ।

दुर्घटनामा गम्भीर घाइते भएका उनको नर्सिङहोम नेपालगंजमा उपचारको क्रममा मृत्यु भएको हो । भे.१२ प ५०६० नम्बरको मोटरसाइकल चालकलाई प्रहरीले नियन्त्रणमा लिएको छ । यस्तै सिराहा, औरही गाउँपालिका-१ दरैहियास्थित सडकमा बरियारपट्टीबाट औरहीतर्फ जाँदै गरेको म.प्र.०१-००४ प ८२२८ नम्बरको मोटरसाइकलको ठक्करबाट साईकलयात्री सोही ठाउँ बस्ने २२ वर्षीय रमेश मण्डलको शुक्रबार राति मृत्यु भएको छ ।

ठक्करबाट गम्भीर घाइते भएका उनको सप्तऋषि अस्पताल लहानमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकल चालकको नोवेल अस्पताल विराटनगरमा उपचार भइरहेको छ ।

यता कास्की, अन्नपुर्ण गाउँपालिका-३ चुइनेपहरास्थित सडकमा बिएए ४४४८ नम्बरको स्कारपियो र ना.३५ प ६७३१ नम्बरको मोटरसाइकल एकआपसमा ठक्कर खाई शुक्रबार राति दुर्घटना हुँदा मोटरसाइकल चालक सोही गाउँपालिका-३ लक्ष्मी देउराली बस्ने ४२ वर्षीय पुष्पराज पौडेलको मृत्यु भएको छ ।

दुर्घटनामा गम्भीर घाइते भएका उनको मणिपाल शिक्षण अस्पतालमा उपचारको क्रममा मृत्यु भएको हो । स्कारपियो चालकलाई प्रहरीले नियन्त्रणमा लिएको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।